Abaphila ngokuthenga bethingisa impahla ezitaladini enzikini yedolobho leHarare bathi bazehluleka ukuziphilisa kulandela ukususwa kwabo ngoLwesine endaweni ezitshiyeneyo kulandela ukukhwaza kukaMongameli Robert Mugabe othe bangcolisa izitalada.
Omunye wabalo bathwaliswe nzima ngamapholisa nguMnu. Tendai Chanetsa, othengisa izilinywa ezifana lamatamatisi kuJason Street, otshele iVOA Studio 7 ukuthi kala amanye amacebo okuziphilisa.
UChanetsa uthe uzabuyela njalo ezitaladini ngoba akasoze enelise ukuphandela imuli yakhe ukudla.
UDavid Mangena, omunye njalo walabo abathengisa ezitaladeni, uthe amapholisa ephule ilungelo labathenga bethengisa impahla ngokubasusa ezitaladini ngenkani.
Abahlaziya ezombusazwe bathe kuyayangisa okwenziwe nguhulumende owehluleke ukwethulela abantu imisebenzi njengalokho akwenza ekhankasa kungakenziwa ukhetho ngomnyaka ka2013.
UNkosazana Geraldine Sibanda uthe ukwenza kukahulumende kuveza mgceke ukuthi useyehluleke ukwenza kube lemisebenzi elizweni leZimbabwe.
Lokhu kusekelwe nguMnu. Alphios Mapuranga, isikhulumeli sebandla ele United African National Council, othe uMugabe ulakho ukuletha ukungahlaliseki elizweni uma engaqhubekela phambili exotshana labathengisa ezitaladini.
Abantu abathengisa edolobheni leHarare babhekane lodubo lokuswela indawo zokuthengisela. Lokho sokubangele ukuthi bagcwale indawo yonke enzikini yedolobho leli.
Ukungatholakali kwemisebenzi elizweni kwenza ukuthi abantu bathenge impahle yokuthengisa.