Owake waba ngumphathintambo wezemfundo yaphezulu obaleke elizweni uMnu Jonathan Moyo uthi abantu abanengi bathukuthele ngokugenqulwa kukaMnu Robert Mugabe libutho embusweni.
Kodwa amazwi la abe yinhlekisa enkulu enkundleni zokukhulumisana ebulenjini ezigoqela eyeFacebook leTwitter inengi lisithi liyajabula ngokususwa kukaMugabe.
Ekhuluma emsakazweni kamabonakude weBBC ngoLwesine, uMoyo uchothoze uhulumende omutsha esithi ngowamasotsha njalo uthi eZimbabwe akusalandelwa umthetho.
Wengeze wathi ukususwa kukaMugabe embusweni kwenziwa ngaphandle komthetho ngoba wakhitshwa ngodlakela njalo kungalandelwa isisekelo sombuso welizwe, iconstitution.
Isikhulumeli sikaMongameli Mnangagwa uMnu George Charamba, ekhuluma emsakazweni weZBC yena uthe uMoyo uyawumana.
Lanxa bebanengi abachothoze amazwi kaMoyo, bakhona njalo abathi ngempela uqinisile ukuthi ibutho lephule umthethosisekelo ngokugenqula uMugabe.
Omunye wabo yingcwethi ecubungula ezombusazwe uMnu Dinizulu Macaphulana yena othe uzulu weZimbabwe kumele akunanzelele ukuthi uhulumende okhona wangena ngokungekho emthethweni.