amalinks wokungena

Breaking News

Mwaruwari: Ngizimisele Ukuphathisa Abasakhulayo Kwezenguqu


Benjani Mwaruwari

Umdlali wenguqu owayengukaputeni weqembu lesizwe uBenjani Mwaruwari uthi uzimisele ukuphathisa abasakhulayo ukuze bafeze amaphupho abo okudlala umdlalo wenguqu kuzinga laphezulu.

UMwaruwari ubekhuluma emkhosini owokupha amabhola kumaqembu ayithobaminwembili aphatheke kuma finals awomncintiswano walonyaka owe Benjani Mwaruwari Youth Festival kunyanga ezimbalwa ezedluleyo oqhutshelwe ehofisini yenhlanganiso yeZifa koBulawayo ngoLwesibili.

Lawamaqembu ngagoqela iMpumelelo okuyiyo ephakamise isicoco salonyaka, iqembu le LMC, iBantu Rovers, iSantos, iAjax Hotspurs, iChicken Inn kanye lezikolo ezimbili ezithi iMagwegwe High School kanye lesikolo seMvuthu esitholakala endaweni yeSigodini.

UMwaruwari uthembise ukuba uzaqhubeka elokhu esekela ukuthuthukiswa kwabadlali abasacathulayo ethi laye waqala edlala esikolo kanye lakumaqembu abasakhulayo.

Iqembu ngalinye liphiwe amabhola amahlanu nguMwaruwari njalo ilunga lenkokheli yenhlanganiso yeZifa koBulawayo uMkhululi Mthunzi uthe amabhola lawa azaphathisa kakhulu abadlali abasakhulayo.

Umncintiswano we Benjani Mwaruwari Youth Festival usuleminyaka emithathu wasungulwayo njalo kulabadlali abalitshumi lambili abaphathiswa nguMwaruwari ngemali zesikolo ngemva kokuba bephatheke kulimidlalo.

Umsekeli kamongameli wenhlanganiso yeZifa uOmega Sibanda nguye obengumhlonitshwa kumkhosi lo owokupha amabhola njalo ukhuthaze ukuba kube lokumanyana lokusebenzelana ndawonye emdlalweni wenguqu.

UBenjani uthi usethethe umhlalaphansi ekudlaleni umdlalo wenguqu njalo usezasebenza kanzima ukuba isikolo sakhe esokufundisa abasakhulayo umdlalo wenguqu siqale ukusebenza edolobheni lako Bulawayo.

XS
SM
MD
LG