Inhlanganizo elwela amalungelo abathengi iConsumer Council of Zimbabwe (CCZ) ithi imuli elabantu abayisithupha idinga imali engangeZ$20,985 ukuze yenenise ukuhlawulela indleko zayo ngenyanga.
Kumbiko ewethule izolo inhlanganiso le ingxenye yalimali eqondane lokudla kuphela yiZ$11,300.
Ekhangelane lamasepa okugeza lawokuwatsha yiZ$1,059 kuthi eyendleko ezifana le-rent, inhlawulo yesikolo, amanzi lokunye yiZ$8,600.
Inhlanganiso zezisebenzi zithi okudanisayo yikuthi izisebenzi zihola imali ephansi kakhulu kulale ekhulunywa yinhlanganiso yeCCZ.
Ababalisi, bona abaphakathi kokukhalala umsebenzi bathi bahola imali ephakathi kweZ$3,000 leZ$4000 kuphela.
Ugatsha lukahulumende olubona ngezamanani olweZimbabwe National Statistics Agency (ZimStats) lwethule umbiko kumaviki edluleyo lusithi imuli yabantu abahlanu idinga iZ$17,000 ngenyanga.
Ingcwethi kwezenotho uMnu Masimba Kuchera utshele iStudio 7 ukuthi uzulu weZimbabwe jikelele uthwele nzima ngoba balutshwana abantu abayiholayo imali ekhulunywa yiCCZ leZimStats.
