amalinks wokungena

Breaking News

Chamisa: Asitshiyane Lodlakela Singabi Njenge Bandla leZanu PF


Emngcwabeni kaDr Patson Dzamara

Obelwela amalungelo oluntu uDr Patson Dzamara, obhubhe ngoLwesithathu, ubekiwe namhlanje ekhaya lapho adabuka khona koMutoko.

Umkhokheli webandla leMDC Alliance, uMnu. Nelson Chamisa utshele abasekeli bebandla lakhe abakade besemngcwabeni ukuba baqhubekele phambili ngomxabalazo ngokuthula kungelani lokuba iZANU PF isebenzisa udlakela ibahlukumeza.

Emngcwabeni kaDr Patson Dzamara
Emngcwabeni kaDr Patson Dzamara

Bebebanengi abaze buthana emzini wako Dzamara, endaweni yase All Souls Mission ko Mutoko, eMashonaland East, lapho abakade bezovalelisana lomunye wabo obelwela umbuso okhululekileyo eZimbabwe.

UDzamara ubhubhe ngolwesithathu kuyonale iviki ngemva kokukhulelwa ngumkhuhlane wemvukuzane yemathunjini.

Ekhuluma kulumcwabo umkhokheli weMDC Alliance, uMnu Nelson Chamisa uthe kungelani lokuba iZANU PF yona iqhubeka iloqalo lokuhlukumeza uzulu emfuqa ukuba avuke ngodlakela, abantu kabaqhubeke ngomzabalazo olungela dlakela. Usole kakhulu ingoma zebandla lakhe esichothoza abantu esithi kumele bahlabele ingoma ezilokuthula njalo bangasebenzisi udlakela.

“O-Bvondo, ama slogan enu okuthethisa abantu, asiwafuni. Liyezwa na? Kasingeke sithi thina sincintisane leZANU PF ebulala abantu lathi senze okufanayo. Thina sithi guqula izenzo, kufuze siphakamiselaneni sonke isikhathi hatshi ukwehliselana”

UChamisa usole kakhulu indlela umfowabo ka Dzamara, uItai Dzamara anyamalala ngayo ngemva kokukhakhansela ukuba owayengu Mongameli Umnu Robert Mugabe asuke esikhundleni. Wancoma imuli yako Dzamara ngokuvumela abantwabayo ukuba bangene kwezombusazwe esithi ukuzinikela asebekwenzile kuzabapha inzuzo iZimbabwe isikhululekile.

“Imuli yekwa Dzamra yimuli yamaqhawe, yimuli elokuzinikela. Yimuli eyakhethwa ngu Nkulunkulu. Akula muntu ongena edubeni olunje ukunyamaliselwa umntwana, kuthi omunye obe enguDokotela laye aphinde etshone. Umntu obe esezama ukulwisa laye sesitshiyile”

Umngcwabo kaDr Patson Dzamara
Umngcwabo kaDr Patson Dzamara

Omunye okhulume emcwabeni lo ngumfundisi owe Zimbabwe Devine Destiny, uMfundisi Ancellot Magaya yena othe okubi okwenzakale emulini yako Dzamara kuzalungiswa ngumlimu.

“Ibhayibhili lithi uNkulunkulu kathokozi ngezikhundla zalabo ababusa bona belobubi, ngoba ababi laba baqoqa okubi besebenzisa imithetho”

UDzamara ubeseleminyaka engamatshumi amathathu lane (34) njalo ubhubhe engakathathi njalo engelamntwana ngakhoke utshiye abazali bakhe kanye lomfowabo lodadewabo.

Facebook Forum

XS
SM
MD
LG