Umkhokheli womanyano weMDC Alliance uMnu. Nelson Chamisa uthi iqula lenhlanganiso eyaziwa ngokuthi ngama Elders elikhokhelwa ngowayengunobhala jikelele womanyano weUnited Nations uMnu. Koffi Annan lithi lizahlolisisa izikhalazo zakhe zokuthi kube lokhetho olukhululekile elizweni ekupheleni kwayonale inyanga.
UMnu. Annan ukhokhela iqula elaziwa ngokuthi yiCouncil of Elders, elifike ngoLwesine elizweni ukuzodingisisa ngendlela ukhetho lolu oluqhutshwa ngayo. Iqula leli ligoqela isiphathamandla se United Nations uNkosikazi Mary Robinson, kanye lowayeyisiphathamandla sikahulumende we Algeria uMnu. Lakhdar Brahimi
Ekhuluma lentathelizindaba ngemva kwalumhlangano ngoLwesihlanu, uMnu. Chamisa uthe wazise iqula leli ngokuhluphayo okugoqela i- voters’ roll, indawo zokuvotela, kanye lokuphatheka kwabebutho kwezombusazwe.
Iqula leli lihlangene lomongameli Mnangagwa ekuseni, yena obikwa elitshele ukuthi amalungiselelo okhetho aqhutshwa ngemfanelo.
Ukuze sihlaziye loludaba, sixoxe loMnu. Bhekilzwe Ndlovu, ingcwethi ecubungula ezombusazwe yena ogcizelela ukuthi akusoze kube lenguquko kumalungiselelo okhetho njengoba sokusele amalanga alitshumi kuphela ukuthi luqhutshwe.
