Inengi lithi sokusobala ukuthi ilizwe selibuswa libutho njalo yindlela kamongameli Mnangagwa eyokubonga abamfaka embusweni, beze besuse owayengumongameli uMnu. Robert Mugabe esikhundleni sakhe.
Lokhu kulandela ukukhethwa kowayeyisiphathamandla sebutho lesizwe uMnu. Constantino Chiwenga kanye lesiphathamandla sikahulumende uMnu. Kembo Mohadi ukuthi babe ngabasekeli bakamongameli Mnangagwa kanye lokuba ngomabhalane besibili kubandla leZANU-PF.
Ekhuluma lomsakazo weStudio 7 isiphathamandla sikahulumende uMnu. George Charamba uthe uMnu. Mnangagwa usebenzise isisekelo sombuso sebandla leZANU PF ekhetha ababili laba.
UTshalimani webandla leZAPU eMatabeleland South, uMnumzana Mathew Sibanda uthi akumangalisi okwenziwe ngumongameli Mnangagwa. Uthe kuyazakala ukuthi uMnu. Mohadi ngumngane wakhe.
Olwela amalungelo oluntu, uMnunzna Effie Ncube uthi lokhu bekulindelwe ngabanengi.
UMongameli webandla eliphikisayo eleANSA uMnu. Moses-Mzila Ndlovu uthi uMnu. Mohadi ufakwe njengomceciso nje kulesi isikhundla.
Osakhulayo uThando Gwinji uthi sekucaca ukuthi ibutho lahluthula umbuso. Uthi okwenzakala eZimbabwe akukho emthethweni njalo umthethwandaba sekumele uthathe inyathelo.
Amazwi akhe agcizelelwe yisakhamuzi sakoBulawayo uMnu. Lewis Mhlanga.
UMnu. Mohadi ubikwa wakhulekelwa eminyakeni embalwa edluleyo nguMfundisi odumileyo uMnu. Shepherd Bhushiri, owamtshela ukuthi uzakuba likhosi.
UMongameli Mnangagwa ubezilazila ukukhetha abasekeli bakhe ensukwini ezedluleyo, njalo kucatshangelwa ukuthi ubelindele ukuthi uMnu. Chiwenga atshiye umsebenzi kubutho ukwenzela ukuthi kungathiwa wephule isisekelo sombuso.
