Imuli yabantwana abane ababhubhe ngoLwesihlanu olwedluleyo ngemva kokudubuka kwamafutha ephethulo ebatshisileyo esitolo abakade belele kuso eTshiphisane eMatopo South ithi isithole usizo lokungcwaba laba abantwana ngoLwesithathu olugoqela oluvela kumsekeli kamongameli uMnu. Phelekezela Mphoko, yena ovakatshele limuli le izolo ukuyiduduza.
Ababhubhileyo babalisa izelamani uMbongiseni Dube obeleminyaka emibili, uGugugulethu Dube obeleminyaka eyisitshiyagalolunye, kanye lo Iphithule Dube obeleminyaka elitshumi lanye. Unina wababhubhieyo uNkosazana Siphiwe Dube ubikwa esithi ubevakatshele ekhaya abantwana bakhe baze basale bebhubha.
Omunye obhubhileyo kungozi yinye ngu Thandolwenkosi Bhebhe obeleminyaka emithathu.
Abantwana laba babikwa bebesele loMnu. Limukani Mnguni, oleminyaka engamatshumi amabili, onguye olayithe isitofu esisebenzisa amandla e-gas, waphuza ukusilayitha, okubangele ukuthi iphethulo ebigcinwe kuleyo ndawo ilumathe.
Ukuze sizwe okunengi okwenzakalayo ngaloludaba, sixoxe lommeli we Matopo South edale lephalamende uMnu. Saul Mahalima Ncube, owebandla leZANU PF.
UMnu Ncube utshele uSithandekile Mhlanga weStudio 7 ukuthi uMnu. Mphoko uphinde wavakatshela indawo yokungcwabela imuli kamuyi owayengumsekeli kamongameli uMnu. Joshua Mqabuko Nkomo, eseduzane lemuli yakoDube, okuyikho okungcwatshwe uMnu. Nyongolo Nkomo, uyise kamuyi.
