EleZimbabwe lithi liyaziqhenya ngokwenelisa ukwehlukanisa amaphahla azelwe ngenyanga ezintathu ezedluleyo enamathelene esisweni eHarare ngoba lokhu kungumsebenzi omqoka otshengisa ukuthuthuka kwelizwe kunhlelo zempilakahle.
Amaphahla la alaliswe esibhedlela se Children’s Hospital esigodlweni.
Udokotela onguye obekhokhela lumsebenzi uMnu. Bothwell Mbuwayesango utshele iStudio 7 ukuthi iqula elengcwethi zempilakahle labodokotela abasebenze lalo yilo elibangele ukuthi umsebenzi lo uphumelele.
Okubikwa kuyikho obekulukhuni yikwehlukaniselana amaphahla la isibindi ngoba besisodwa. Izibindi lezi zikhangelelwe ukukhula kuhle lanxa zisikiwe.
Amabizo amaphahla la, ngu Kupakwashe lo Tapiwanashe Chitigo njalo abazali babo bathi bayathokoza ngalesisehlakalo.
UDokotela Lieutenent Colonel Israel Dube, omunye wabaqhube lumsebenzi utshele uSithandekile Mhlanga weStudio 7 ukuthi umsebenzi sebewugqibile njalo bakhangelele ukuthi abantwana bebuyele ekhaya izilonda zingaphola.
