Igqwetha elilwela amalungelo oluntu njalo elilunga lebandla leMDC ekhojhelwe ngumnumzana Welshmn Ncube, uMnu. David Coltart usecele uhulumende weleMelika ukuthi ayekethise izijeziso zenotho ezafakelwa inkokheli yebandla le Zanu PF ebalisa uMongameli Mugabe esithi izijeziso lezi kaziphathisi muntu kodwa zipha ithuba inkokheli yeZanu PF ukuthi icatshe ngomunwe.
U Coltart wenze lesi siceleo izolo emkhosini wokuphawula ugwalo lwakhe oluthiwa ‘The Struggle Continues: 50 Years Of Tyranny’ esigodweni seleMelika, eCapitol Hill, eWashington DC.
UColtart uthe sekuleminyaka ethile yena labanye abakumabandla aphikisayo besithi izijeziso lezi kumele zesulwe ukwenzela ukuthi ibandla leZanu PF lingatholi ithuba lokuncindezela uzulu lisithi imbangela yizijeziso zenotho.
Owayengumphathintambo wezemfundo kuhulumende womanyano, utshele lumbuthano ukuthi esikhathini esedluleyo inkokheli yebutho ibimanyene kodwa lokhu kwaqhamuka ukudonselana amandla kulelibandla kabasamanyananga.
Umgcinisihlalo wekhomidi yabammeli bedale le Congress eye U.S House Foreign Affairs Committee, UMnu. Ed Royce, uncome uColtart ngokuloba ugwalo lwakhe esithi luzenelisa ukuthi udaba lwe Zimbabwe luhlale lusemlonyeni wabantu emazweni wonke jikelele.
Ugwalo luka Coltart lolu seludale inkulumo ngemva kokuba umsekeli kaMongameli, uMnu. Emmerson Mnangagwa ethe kasiloqiniso elalotshwa kugwalo lolu okokuthi yena watshotshozela ukubulawa kwabantu ngesikhathi se Gukurahundi. Kodwa iphephandaba le The Chronicle laveza ukuba mpela wakhuluma lawa mazwi ngomnyaka ka 1983.
Elinye njalo ilunga le Congress, uMnu. Gregory Simpkins ubuze uColtart ukuthi uzwa njani ukuthiwa ngowe Zimbabwe yena emhlophe wathi akumkhathazi lokhu ngoba isendo lakhe lafika eZimbabwe endulo.
