Inhlanganiso ezilwela ilungelo loluntu elizweni zimanyane lamanye amazwe ngoMvulo ukunanza ilanga lokukhumbula abantu abanyamalalayo ele United Nations International Day of the Victims of Enforced Disappearance, ngesikhathi inengi eZimbabwe likhumbula intathelizindaba uItai Dzamara obikwa wathunjwa ngabantu abangaziwayo kunyanga ezinhlanu ezedluleyo njalo kulokhu kungazakali ukuthi ungaphi.
Ilanga leli linanzwa ekupheleni kwenyanga ka Ncwabakazi minyaka-yonke.
Emkhosini obuqoqwe yinhlanganiso yeZimbabwe Lawyers for Human Rights, abantu abahlukuluzwayo kanye lemuli zabanyamalalayo bakhuthaze uhulumende ukuthi aqinise imizamo yokuvikela abantu, njalo abanye basole ibandla elibusayo ukuthi yilo elibangela lezi izehlakalo.
Inhlanganiso yeZimbabwe Human Rights NGO Forum yethule umbiko isithi uhulumende weZimbabwe wabangela ukunyamalala kukaMnu. Patrick Nabanyana ngomnyaka ka2000, uMnu. Patrick Chizuze ngomnyaka ka2012, njalo wathumba waphinda wahlukuluza uNkosazana Jestina Mukoko labanye abalwela ilungelo loluntu, ngendlela yokwethusela abantu ukuthi bengaphikisani lombuso wakhe.
Ingcwethi ecubungula ezombusazwe uMnu. Walter Nsununguli Mbongolwane uthi eleZimbabwe lilomlandu ngabantu abanyamalalayo, okugoqela langesikhathi seGukurahundi.
