Iqula elikhokhelwa libhanga elikhulu elizweni eleReserve Bank liphakathi kokuhlolisisa imbangela yokuvalwa kanye lokungathuthuki kwamafekithali akoBulawayo, ngendlela yokuwavuselela.
Umsekeli kasibalukhulu walelibhanga uNkosikazi Khuphukile Mlambo, utshele umsakazo we ZBC ukuthi ibhanga leli lifuna ukubuyisela idolobho lakoBulawayo kusimo elalikuso ilizwe lisanda ukuthola uzibuse, lapho amafekithali wonke ayesebenza.
Kodwa ummeli weBulawayo East edale lephalamende, njalo eyisiphathamandla sebandla le MDC-T, uNkosazana Thabitha Khumalo, uthi kusobala ukuthi uhulumende, okhokhelwa libandla leZANU PF, usekhankasela ukhetho ngalelinyathelo.
Ummeli wePhelandaba-Mpophoma edale lephalamende uMnu. Joseph Tshuma, oyisiphathamandla sebandla leZANU PF uncoma uhulumende njalo uthi kufanele idolobho lakoBulawayo libizwe ngelayizolo elokuthi “koNtuthuziyathunqa”.
Ingcwethi ecubungula ezombusazwe uMnu. Masimba Kuchera uthi inhlolisiso le ingasiza ekuthuthukiseni amafekithali nxa impumela yawo ivezwe sobala.
Isiphathamandla seZimTrade uNkosikazi Jacqueline Nyathi oyingxenye yaleliqula, ubikwa esithi bazaqhuba umhlangano ngoLwesithathu oweExport Financing Awareness ozafundisa abalimi ukuthi bengathola sizo bani kubhanga leRBZ.
