Uhulumende uthi uphakathi kokuxoxisana lamakhansili emadolobheni njengeminye yemizamo yakhe yokulungiselela ukwakha imitshina yama toll-gates emadolobheni, ukwenzela ukuthi athole imali yokulungisisa imigwaqo, njalo aphungule inani labantu kanye lezimota kula amadolobho.
UMnu. Obert Mpofu, umphathintambo wogatsha lukahulumende olubona ngemota zokuhambisa okuyilo oluqhuba loluhlelo uthi uhlelo lolu luzaqhutshwa ngomnyaka ozayo ngemva kokuqedisa olokungezelela ama tollgates emigwaqweni ephuma ngaphandle kwamadolobho eyama highway, ekupheleni kwawonalo umnyaka.
UMnu. Mpofu utshele uSithandekile Mhlanga weStudio 7 ukuthi uhlelo lwama toll gates oluvele lukhona lubukwa ngamanye amazwe akuzwekazi leAfrica njalo sikhulumanje, kulequla elivela eZambia ukuzohlolisisa inhlelo zikahulumende ezemigwaqo.
Kodwa uMnu. Albert Mhlanga, owayelilunga lekhomithi ebona ngemota zokuhambisa edale lephalamende ulisolile lelinyathelo likahulumende, esithi lubangela ubuyanga ebantwini, kukanti akucacanga lokuthi ugatsha lweZINARA lusebenzisa njani imali etholwa kuloluhlelo.
