Ele Canada lithi sokumele liphume enhlanganisweni ye United Nations World Tourism Organization (UNWTO) ngenxa yokuthi ifuna uMongameli Robert Mugabe ukuthi akhuthaze uzulu ngezokwethekelela ilizwe.
Ele Canada libikwa lingavumelani lokuthi uMongameli Mugabe abe ngomunye walabo asebengene kugwalo lwenhlanganiso le iGolden Book on Tourism.
Ugwalo lolu lulamagama abantu abahloniphekayo abakhuthaza ukwethekelelwa kwamazwe kuzobukwa ezemvelo.
Ele Canada lithi uMongameli Mugabe obusa ngocuku njalo owafakelwa izijeziso zenotho ngamazwe entshonalanga, lokhe ekhahlameza uzulu eZimbabwe.
Ngakho-ke ilizwe leli lithi akumelanga abonakale njengomuntu osiza abantu makhaza.
UMugabe loMongameli Michael Sata we Zambia balobe amagama kusivumelwano sokuthi amazwe la womabili enzelwe umhlangano omkhulu owe UNWTO ngomnyaka ozayo.
UMnu. Walter Mzembi umphathintambo wezokwethekelelwa kwelizwe uthe ele Canada akumelanga liqaphise umsila kudaba lolu.
Umnu. Masimba Kuchera ingcwethi kwezenotho uthi ilizwe le Canada litshaya eceleni ngodaba lolu njengoma uMugabe engagcotshwanga ukuthi usezamela inhlanganiso le emhlabeni jikelele.
Umongameli Mugabe Akumelanga Asebenzelane Le UNWTO Ekukhuthazeni Ukwethekelelwa Kwelizwe: Canada
- Gibbs Dube
