Umphathintabo wezamafekithali kwele South Africa uMmnu. Rob Davies uthi inkampani ye Impala Platinum esithwaliswe nzima nguhulumende we Zimbabwe ukuthi iveze indlela ecacileyo yokwabela uzulu amashares ilakho ukusebenzisa isivumelwano se Bilateral Investment Promotion and Protection Agreement (BIPAS) ukwenzela ukuthi ingathathwa nguhulumende.
UDavies utshele iphephandaba le Newsday ukuthi isivumelwano lesi singasetshenziswa ngendlela ezinengi ukwenzela ukuthi inkampani ye Zimplats engaphansi kwe Impala Platinum yabele uzulu amashares okuzasuthisa uhulumende.
Uthe inkampani le kayikaceli uncedo kugatsha lukahulumende lolu loba nje kusaziswa ukuthi kulezizalwane ze South Africa ezathathelwa amapulazi ngabalandeli bebandla le Zanu-PF kulesivumelwano lesi.
Abaphathintambo bengatsha zikahulumende ababona ngezemigodi lokuthuthukisa inotho kazulu ngoLwesithathu bahlafune udaba lokwabiwa kwamashares eZimplats ngaphansi komthetho weIndigenization.
Inkampani ye Zimplats isitshengise ukuthi izakwabela uzulu amashares ayigcosana kulayisilinganiso sokwedlula kancane amatshumi amahlanu ekhulwini-51%.
Umnu. Psychology Maziwisa igqwetha elibona ngezomthetho kugatsha lokuthuthukisa inotho kazulu utshele iStudio 7 ukuthi okwamanje sebethethe isinqumo sokuthi inkampani ye Impala Platinum akumelanga inikwe esinye njalo isikhathi sokuveza ukuthi izakwabela njani uzulu amashares.
Bekumele yenze konke lokhu ngoLwesithathu. Umnu. Kucaca Phulu ingcwethi kwezomthetho wamankampani uthi iZimplats ilakho ukumangalela uhulumende we Zimbabwe eSupreme Court ngokuthi ibanjwa ngamandla ukuthi yabele uzulu amashares.
Isivumelwano Sokuthuthukisa Umnotho we South Afirca le Zimbabwe Singahlenga iPlatinum Holdings
- Gibbs Dube
