Uhulumende uthi ele Zimbabwe lilakho ukuthi lehluleke ukubhadala iholo lezisebenzi njalo lokuqhuba inhlelo zikazulu ngenxa yokuthi kutholakala imali eyingcosana ekwembeni amadayimana eMarange kwele Manicaland.
UMnu. Tendai Biti umphathintambo wezemali owethule umbiko lo ngolweSithathu ntambama, uthi kusukela ngo Zibandlela kusiya kuNhlolanja lonyaka, ilizwe lithole imali yokwemba amadayimana izigidi phose ezingamatshumi amabili zamadollar eMelika kulokuthi lithole izigidi ezedlula amatshumi ayisikhombisa zamadollar.
UBiti uthe ngesikhathi esifanayo kutholakale izigidi ezingamakhulu amane lamatshumi ayisitshiyangalombili amadollar eMelika yemithelo etshiyeneyo.
Bekukhangelelwe ukuthi kutholakale izigidi ezingamakhulu amahlanu lamatshumi phose amahlanu amadollar eMelika.
Uthi lokhu sokuphazamise inhlelo zonke zikahulumende njalo kungenza ukuthi izisebenzi zingatholi iholo eleneleyo kunyanga ezilandelayo.
Amadayimana abekhangelelwe ukulethela ele Zimbabwe lonyaka izigidi ezingamakhulu ayisithupha amadollar eMelika.
Ingcwethi kwezenotho uMnu. Masimba Kuchera uthi uhulumende kumele alungise indlela ezikhaliphileyo zokubhadalwa kwemithelo etshiyeneyo kahulumende kulokuthi akhongozele imali yamadayimana esezandleni zebandla le Zanu-PF.
