Uhlangothi lukahulumende olubona ngezemithelo iZimbabwe Revenue Authority (ZIMRA) ithi ithole imali yemithelo eyedlule okade kukhangelelwe kusukela ngozibandlela kusiya kuMabasa lonyaka.
Umnu. Sternford Moyo umgcinisihlalo weZIMRA uthi imithelo etshiyeneyo ilethele ilizwe izigidi ezingamakhulu ayisikhombisa lamatshumi ayedlula isikhombisa amadollar eMelika.
UMoyo uthi bekukhangelelwe ukuthi iZIMRA ithole izigidi ezingamakhulu ayisikhombisa letshumi lanhlanu amadollar eMelika.
Uthi ukutholakala kwemali eyedlula ekade ikhangelelwe kwenziwe yikuthi kulamafekithali amanengi ayenza impahla ethe xaxa njalo lamankampani akhuphule iholo lezisebenzi.
Uphinde wathi umthelo we Value Added Tax (VAT) yiwo olethele ele Zimbabwe imali enengi kulandelwa ngumthelo we income tax.
Ingcwethi kwezenotho uMnu. Masimba Kuchera uthi loba imithelo etshiyeneyo ilethele ele Zimbabwe imali eyedlula leyo ekade ikhangelelwe, kuyamangalisa ukuthi akulamali etholakale ekwembeni amadayimana.