amalinks wokungena

Breaking News

EleBotswana Liqhelisa Isikhathi Sohlelo lweLockdown Ngeviki Elilodwa


Umongameli Mokgweetsi Masisi wakwele Botswana
Umongameli Mokgweetsi Masisi wakwele Botswana

Uhulumende weleBotswana usebike ngokuqhelisa isikhathi sohlelo lokwalisa abantu ukuhamba hamba, olwelockdown, ngeviki elilodwa, njengendlela yokuvimba ukumemetheka kweCovid 19.

Lokhu sekunike abanye abeZimbabwe abahlala kulelozwe, inengi labo elibhekane lobunzima, ithemba lokuthi impilo isizaphose ibuyele kusimo saphimbilini kwelockdown.

Kodwa iBotswana izaqhubeka ilokhe ibamba umthetho kuze kufike u22 Nkwenkwezi, kuyindlela yokuba lesiqiniseko ukuthi akula abanye ababanjwa belo mkhuhlane wecoronavirus.

“Ikhomiti ye COVID-19 Presidential Task Force, icebise ukuthi kwengezwe ilockdown ngeviki elilodwa kuqala mhlaka 1 Nkwenkwezi kusiya kusikhombisa, kuthi amaviki amabili alandelayo siqale ukuyekethisa. Kuqakathekile ukulazisa ukuthi ukwengezwa kwamalanga elockdown kuzabona sifaka indlela ezisaphuma ngazo kancane kancane, ukuze sibuyele kusimo sakuqala. Lokhu kuzakwenzakala uma sibona ukuthi kulokuphumelela kwesinkwenzayo.”

EleBotswana seliphose lifike iviki lingazange libhalise umuntu obanjwe ligciwane lecorona.

Kuze kufike lamuhla, kulabantu abangamatshumi amabili lambili ababanjwa umkhuhlane wecorona kweleBotswana, kuthi oyedwa walahlekelwa ngumphefumulo.

Abanye abeZimbabwe abahlala eBotswana bathi kuyathembisa ukuthi uma kungaqhubeka kungela nani eliphezulu lababanjwa umkhuhlane wecoronavirus kuhle, uhlelo lwelockdown lungaqala ukuyekethiswa mhlaka 7 Nkwenkwezi.

Umnunzana Mthabisi Dube oweZimbabwe oseGaborone uthi impilo inzima kuye wonke umuntu ngesikhathi selockdown, ngakho kungabazindaba ezinhle uma impilo ingaqala ukubuyela esimeni sakuqala.

“Akulula ukutshona uhlezi ungazi ukuthi ikusasa injani. Zindaba ezithembisayo ukuthi eleBotswana lilakho ukuqala ukuyekethisa imthetho yelockodwn, noma nje impilo kumele ifakwe phambili. Abanye bethu bayadubeka ngesikhathi lesi, bengela ngitsho abangakudla ngoba bephila ngemisetshenzanyana.”

Omunye ophila ngokubamba bamba imsebenzi yama piece jobs, umnunzana Nkazimulo Moyo, uthi noma nje bekhathazeka ngezempilakahle ngesikhathi secoronavirus, kuqakathekile ukuthi ezinye izigaba zomnotho ziqale ukuvulwa ukuze abantu benelise ukuphila.

“Abanye bethu babuyele ekhaya ngenxa yobunzima obulethwe yilockdown. Kungaba kuhle uma kungaqalwa ukusetshenzwa kwenzinye indawo, ukuze senelise ukuziphilisa.”

Umongameli Masisi uthi kungedlula u7 Nkwenkwezi kungabanga labanengi abatholakale belomkhuhlane wecoronavirus, kuzaqala ukuvulwa amabhizimusi kancane kancane.

Noma nje kulethemba lokuthi eleBotswana, ngenxa yenani eliphansi labantu abalomkhuhlane wecoronavirus, lizaqala ukubuyela esimeni sakuqala, kungaba yindlela ende, ngoba kungaziwa ukuthi isimo singathatha yiphi indlela kusasa.

XS
SM
MD
LG