EleMelika ngoLwesine lifikisa umnyaka owodwa ngemva kokuhlaselwa kwephalamende yalo ngodlakela ngabasekeli bakaMnu Donald Trump mhlaka 6 ngoZibandlela nyakenye.
Abantu laba babezama ukuvimba ukungena kukaMnu Joe Biden embusweni kulandela ukunqoba kwakhe uTrump kukhetho lukaMongameli.
UBiden ukhangelelwe ukwethula amazwi ngaloludlakela ngoLwesine emini.
Igqwetha likahulumende elikhulu, uAttorney General uMnu Merrick Garland, wethule owakhe umbiko ngoLwesithathu esithi ugatsha lwezemithetho, iDepartment of Justice (DOJ), lusaqhubeka ngophenyo lwalo.
Uthembise njalo ukuthi bonke ababa lesandla kulolu dlame bazabotshwa bajeziswe kungakhathalekile ukuthi bangobani.
UMnu Garland wengeze wathi okwamanje sebebophe abantu abedlula amakhulu ayisikhombisa, 725 besetheswa amacala atshiyeneyo phezu kwalesisehlakalo.
Iphalamende layo iya phambili ngophenyo lwayo. Abanye bathi uTrump laye kumele abotshwe ngoba kunguye owatshotshozela loludlakela.
Kodwa ohlaziya ezombusazwe uMnu Tim Muringai utshele iStudio 7 ukuthi kaboni lokho kungenzakala ngoba kungahlela umzekeliso omubi embalini yeMelika.
