EleSweden lithi lizancedisa eleZimbabwe ngemali engamadola ayizigidi eziyisithupha lamakhulu amahlanu amadola; 6, 5 million dollars, esokuncedisa amankampani elizweni ukuthi athuthukise inhlelo zamandla amagetsi emaphandleni.
Kuphawulwa lesi isikhwama eHarare ngoLwesithathu, isiphathamandla senkampani yeSwedish International Development Authority, eseZimbabwe, uNkosikazi Mette Sunnergren uthe ilizwe lakhe lisungule loluhlelo ngoba kusobala ukuthi inengi labantu emaphandleni lisebenzisa amafutha eparaffin, lokunye okuphikisana lokulondolozwa kwemvelo.
Lokhu kwenzakala kulesiphathamandla esivela kweleBelarus elizweni, uMnu. Viktor Sheiman, yena osenxuse umongameli Mnangagwa elizweni lakhe. Amazwe la womabili asebenzelana ndawonye ukuthuthukisa inhlelo ezibalisa ezokulima, ezokwenjiwa kwamatshe aligugu, kanye lezamandla amagetsi.
Ukuhlaziya loludaba, sixoxe loMnu. Thamani Ncube, owayengukhansila weMadlambuzi ePlumtree.
UMnu. Ncube uthi kufanele uhulumende ancedise abantu emaphandleni ngentengo yamandla amagetsi ngoba lanxa ekhona abenelisi ukuwathenga. Uthi lokhu kubangela ukuthi abantwana besikolo besalele emuva kulabanye babo abahlala emadolobheni.
