EleZimbabwe limanyane lamanye amazwe ngoLwesine ukunanza ilanga lokulwisana lomkhuhlane woqhuqho, eleWorld Malaria Day, ngesikhathi uhulumende esithi selehlile inani labantu abahlaselwa kumbe ababulawa yilesi isifo.
Lokhu kwenzakala amazwe abalisa eleZimbabwe, Mozambique, kanye leMalawi ehlaselwe lizulu lesiphepho uCyclone Idai, elabulala abantu njalo latshiya abanye bengelandawo zokuhlala.
Ingcwethi kwezempilakahle zithi amachibi atshiywa yilelizulu engabangela ukwanda kweminyane kanye lomkhuhlane woqhuqho.
Isigodlo sikahulumende weMelika eZimbabwe sethule umbiko ngoLwesithathu sitshayela uhulumende weZimbabwe ihlombe ngemizamo yakhe yokulwisana lalumkhuhlane. Umanyano weWorld Health Organization uphatheke kumikhankaso eminengi ngoLwesine eyokwazisa abantu ngemizamo yokulwisana lemalaria.
Ukuhlaziya loludaba, sixoxe lengcwethi kwezempilakahle, uDokotela Elopy Sibanda.
