Kubhubhe abantu abayisithupha, 6, ngeCovid-19 eZimbabwe ngoLwesibili njalo kwatholakala abedlula amakhulu amahlanu, 519, belomkhuhlane lo.
Lokhu kukhweze inani lasebefile laya kunkulungwane elamakhulu phose ayisikhombisa, 1,691.
Asebebanjwe lumkhuhlane bona sebephezu kwenkulungwane ezingamatshumi amane, 42,714.
Abahlatshwe ijekiseni yakuqala yokuvikela lumkhuhlane izolo bedlula inkulungwane ezimbili, 2,157. Abahlatshwe eyesibili bedlula inkulungwane ezintathu, 3,369.
Asebehlatshwe eyakuqala bonke sebengu706,158 kuthi asebehlatshwe eyesibili njalo ingeyokucina bona sebengu440,220.
Kusenjalo, uhulumende uthi ilizwe lizathola imijovo eyizigidi ezimbili ezilengxenye, 2.5 million eyeSinovac evela kweleChina ekupheleni kwenyanya.
Eminye eyingxenye yesigidi, 500,000 izafika elizweni ivela njalo kweleChina ngempelasonto.
Umphathintambo wezempilakahle uMnu Constantino Chiwenga wazise izolo ukuthi ingafiki limijovo, bazaqakathekisa ukuhlaba abantu endaweni eziduzane lemingcele yelizwe ezibalisa iForbes, iChirundu, iKariba kanye lalapho okuthengiselwa khona igwayi.
Ezinye njalo zibalisa erenkini koBulawayo, emkambo weMbare, eSakubva, leHwange.
Uthe njalo bazaqakathekisa abasebenza eCottco laseGrain Marketing Board (GMB).
Isikhulumeli sebandla leMDC Alliance eMatabeleland South uMnu Ntando Ndlela utshele iStudio ukuthi indawo ezifana lakoGodlwayo, ePlumtree, eMatopo, laseBeitbridge lazo kumele ziqakathekiswe ngoba amajekiseni esilela kulezondawo.
