Kambe Liqiniso Ukuthi EleZimbabwe Liyakhokhela EAfrica Ngokungethembeki?

WASHINGTON —  Kulandela ukudingisisa okwenziwe yinhlanganiso ye Afro Barometer ngoLwesithathu okuveza ukuthi eleZimbabwe yilizwe lesithathu elingathembekiyo phakathi kwamazwe eAfrica, inengi lezizalwane zeZimbabwe lithi liyavumelana lalumbono ngoba lihlezi lifumbathisa iziphathamandla zikahulumende ukuthi zithole ezikufunayo.

I-Afrobarometer ithi amazwe akhokhelayo kudaba lokungethembeki ngele Nigeria le Egypt, lilandelwa ngele Zimbabwe, njalo asekucineni kwaloluluhlu ngawe Malawi, Lesotho, le Botswana.

Ukuze sihlaziye loludaba, uSithandekile Mhlanga we Studio 7 uxoxe loMnu. Roderick Fayayo, isiphathamandla se Progressive Bulawayo Residents Association, endawonye loMnu. Albert Mhlanga, omela iPumula edale lephalamende. UMnu. Mhlanga uthi uvumelana lokudingisisa kweAfro Barometer ngoba izehlakalo zokungethembeki ziyanda elizweni.