UMongameli Emmerson Mnangagwa ngoMgqibelo lange Sonto uhlangane lenkokheli yamazwe atshiyeneyo ngesikhathi uzulu kwele Zimbabwe ekhala ngokukhahlanyezwa libutho.
Uhlangane lenkokheli le edolobheni leAddis Ababa kwele Ethiopia lapho okulomhlangano omkhulu oweAfrican Union ogqitshwa ngoMvulo.
Kubikwa ukuthi utshele inkokheli le, egoqela umongameli wakwele Namibia, ukuthi ukubulawa kwabantu eZimbabwe ngoZibandlela kubangelwe ngamabandla aphikisayo afuna ukumsusa ngenkani esikhundleni.
Umhlangano weAfrican Union lo, obizwa ngokuthi yi32nd Second Session of The Assembly of The African Union, ulesihloko esithi the Year of Refugees, Returnees and Internally Displaced People.
Kambe isihloko lesi sitshoni ebantwini abayiziphepheli? UMnu. Bhekimpilo Weza, odabuka kwele Zimbabwe oyisiphepheli eDukwi Camp kwele Botswana, uthi inhlanganiso yeAfrican Union leye Southern African Development Community sezehlulekile ukukhathalela iziphepheli.
