amalinks wokungena

Breaking News

Abantu Badlana Ingqondo Ngokungayi Kuka Mnangagwa Emhlanganweni weZanu PF eHwange


Zanu PF Hwange Rally

Ingcwethi ezicubungula ezombusazwe zithi ukwehluleka kukaMongameli Emmerson Mnangagwa ukuba khona emhlanganweni wokukhankasela ukuthola usekelo kukhetho owebandla lakhe leZANU PF eHwange ngoLwesithathu kuveza ukuba angabe esesabela ukuphinda kwesehlakalo sako Bulawayo sangempelaviki.

Lokhu kulandela ukudubuka kokunakanelwa ukuba libhomba enkundleni yeWhite City koBulawayo ngoMqgibelo lapho okufe abantu ababili kwalimala abambalwa.

Zanu PF Hwange Rally
Zanu PF Hwange Rally

Ingcwethi ezicubungula ezombusazwe zithi uMongameli Mnangagwa engabe esesesabela impilo yakhe ngoba kungaziwa ukuthi kuyini okwenzakalayo ngemva kwales’isehlakalo.

Abantu labo abalandela ezombusazwe babona okufanayo loba abanye besithi lokhu kwenziwa yikuthi wangena ngendlela engaqondanga embusweni.

UNkosazana Mercy Mwanza, isakhamuzi sase Harare, uthi okwenzakale ko Bulawayo kuhlasimulisa umzimba ngakho akamsoli uMngangagwa ngokwesabela impilo yakhe.

“UMnangagwa eze ehluleke ukuya emhlanganweni weHwange ngibona engani usesesabela impilo yakhe. Siyakhumbula ukuthi wake wafakelwa itshefu ekudleni eMatabeleland njalo okwamanje sokudubuka ibhomba. Asisakwazi ukuthi kuyini okunye okuzenzakala eMatabeleland.”

Esinye njalo isakhamuzi seHarare, uMnu Mthulisi Nyoni, uthi kungabe kubangelwa yindlela angena ngayo embusweni ukuthi ahlalele evalweni.

“… Singathi yindoda eligwala. Akala qiniso ngokuphepha kwakhe nxa sikhangele okwenzakala eWhite City Stadium esesigabeni seMatebeleland. Ngakho-ke ukuphepha lokhuyana kakakuthembi kakuhle. Okunye yikuthi kangenanga kahle embusweni njalo kaselaqiniso labambikelayo.”

Lapho obekumele uMnangagwa akhulume lozulu ...
Lapho obekumele uMnangagwa akhulume lozulu ...

UMnu. Discent Bajila, isiphathamandla sebandla leMDC ekhokhelelwa nguMnu. Welshman Ncube, uthi kukhona okutshaya amanzi.

“Ngokubona kwami kukhona okwenzakalayo esingakutshelwayo njengozulu okumayelana le-security kunkokheli kungabe kukhonake mhlawumbe bayaxabana bodwa abesibuthweni bexabana loMongameli uMnangagwa njalo besebehamba bemethusela laphayana la laphaya.

“Kuphinde kwenzakale futhi ukuthi kungabe kukhona ezinye izitha alazo ngaphandle kwebandla lakhe kumbe ezingaphandle kwabebutho kodwa kukhona okutshaya amanzi ngokukhangelisisa kwami kuzaba lempumela emibi mhlawumbe singakayi kukhetho kumbe sisanda ukubuya kukhetho, isimo asimanga kahle.”

Ingcwethi ecubungula ezombusazwe, uMnu Siphosami Ndlovu, uthi uMnangagwa angabe esesaba udaba lombuqazwe weGukurahundi emhlubulweni weMatabeleland.

“ … Lokhu kusitshela ukuthi izenzo zakhe azenzayo ngesikhathi seGukurahundi sezimlandela ngakho ke kufanele axolise kuzulu waseMatebeleland ukuze into zimlungele.”

Zanu PF Hwange Rally
Zanu PF Hwange Rally

Kodwa isiphathamandla seZANU PF, uMnu Munashe Mtutsa, uyakulandula lokho esithi uMnangagwa ubevele engahlelanga ukuya emhlanganweni weHwange.

“IRally le ibingalungiselelwanga ngumkhokheli welizwe. Irally le ibilungiselelwe yinkokheli yeZanu PF yeHwange kodwa umongameli ubevele elenhlelo zakhe. Ubefanele ahlangane lama investors abevela eGermany le Belgium eHarare yikho ethe esuka kuprogram yeHwange Colliery uhle wahamba eHarare.

“Bekumele ukuthi amise umhlangano wakhe lama investors ngoba namhlanje ngoLwesine bekumele aphume phandle kwelizwe esiya eTanzania. Akazange etshiye irally akade eyilungiselele. Irally yeMatebeleland North izenzakala eLupane ngelanga elizaziswa abantu. Lokhu kodwa kumele abantu benanzelele ukuthi upresident uqakathekisa izinto zenotho hayi ezepolithikisi.”

Ekhuluma lentathelizindaba zomsakazo weBhilithani owe BBC, uMnangagwa wazise ukuba ucabangela icele lebandla lakhe axabana lalo ele Generation 40 elalikhokhelelwa nguNkosikazi Grace Mugabe esithi uzamelela amapholisa ukuthi acubungule loludaba.

Abasemhlanganweni weZanu PF eHwange
Abasemhlanganweni weZanu PF eHwange

Kolonye udaba, abesigodlo sommeli weMelika eZimbabwe ngoLwesine babe lomhlangano lentathelizindaba ezisakhulayo ezingamalunga awenhlanganiso yeYoung Journalists Association (YOJA).

Lumhlangano uqoqwe ngenjongo yokudinga ukuzwa imibona yabezindaba ngomumo oselizweni ngales’isikhathi kulungiselelwa ukhetho lokudinga umongameli, amalunga edale lephalamende kanye lamakhansila ekupheleni kwenyanga.

Emhlanganweni lo, eleMelika liveze sobala ukuthi lifisa ukuba eleZimbabwe liqhube ukhetho olukhululekileyo njalo olulokuthula ukuze livuselele ubudlelwano obuqinileyo bokwengeza uncedo lokuthuthukisa umnotho welizwe kuncede ukuthuthukisa inhlalakahle kazulu weZimbabwe yena oseleminyaka ephila phansi kombuso wocuku.

Udaba Esilethulelwe NguGibson Bhebhe
please wait

No media source currently available

0:00 0:04:38 0:00

Facebook Forum

XS
SM
MD
LG