Esigabeni lapho esixoxa lezizalwane zeZimbabwe esezihlala kwamanye amazwe kuStudio 7, eseDiaspora, liviki sibe lethuba elihle lokuxoxa loNkosikazi Sisa Sibanda Ncube. Unkosikazi Ncube wasuka eZimbabwe ngomnyaka ka 2000 ethuthela eMelika lemuli yakhe ngemva kokuthola umsebenzi komkakhe kulelo lizwe.
Wathi efika kweleMelika wafumana ukuthi ukuphila kwabantu lamasiko kwasokwehlukile. Uthi njengomuntu owavela wakhula ekhonza enkonzweni yeSabatha wakubona kufanele ukuthi adinge laye ukuhlanganelana lamanye amakhosikazi angamakholwa aweSabatha.
Wabatholake lawo makhosikazi baqala ukubuthana belihlekana. Bathi bebuthene benjalo ngomnyaka ka2004 kwaphuma umnqondo wokuthi babumbe umanyano ofana lababelawo bese khaya eZimbabwe obizwa ngokuthi ngumanyano kaDokha. Okulaphoke okwasungulwa inhlanganiso kumbe umanyano abawubiza ngokuthi Zimbabwe Adventist Women Abroad Conference-ZAWAC.