Igqwetha likaMongameli weMelika uMnu Donald Trump selibanjwe ngumkhuhlane weCovid-19.
Eloba enkundleni yeTwitter izolo uTrump uncome uMnu Rudy Giuliani esithi usebenza gadalala kudaba lwakhe lokuphikisa impumela yokhetho olusanda kwedlula lapho uTrump anqotshwa khona nguMnu Joe Biden.
UMongameli Trump uthe leyomizamo izaqhubeka. Ufisele uMnu Giuliani ukuphola okuphuthumayo.
Umkhuhlane weCovid-19 umemetheka ngendlela ethusayo eMelika kulezinsuku njalo phakathi kwamalanga ayisithupha edluleyo bedlula isigidi, 1 million, abantu abafunyanwe belawo.
Ngelanga kufa abantu abedlula inkulungwane ezimbili, 2,000.
Asebebanjwe lumkhuhlane selokhe waqhamukayo bafika phose izigidi ezilitshumi lanhlanu, 14,7 million kuthi asebefile bona bangu-281,000.
Sixoxe lesizalwane seZimbabwe esihlala eTexas, eMelika uMnu Garry Thwala Jackson utshele iStudio 7 ukuthi ukubanjwa kukaGiuliani yilumkhuhlane kuveza sobala ukuthi awukhethi.
Ngakho, uthi abantu kumele bazivikele ngaso sonke isikhathi.
