Impelaviki edluleyo ibingekho nhle kwezemidlalo kweleZimbabwe njengoba iqembu elimela ilizwe emdlalweni kakhilikithi linqotshwe ngamaruns amahlanu ngele Ireland kumncintiswano wezizwe zomhlaba ngoMgqibelo.
Limpumela itsho ukuba iqembu leZimbabwe lise ngozini yokuphutsha imidlalo yalo linqobe kanye kusibaya sika Pool B njengoba lenelise ukunqoba ele United Arab Emirates ladliwa ngamazwe athi eleSouth Africa, elePakistan, eleWest Indies kanye lele Ireland njalo lisalelwe yikuba lidlale leqembu le India eliyilo elikhokhelayo phezu kwengalane yemiklomelo.
Ngakwelinye icele iqembu elimela ilizwe emdlalweni we tennis linqotshwe nge 4 ka 1 ngele Bosnia – Herzegovina emdlalweni we Euro/Africa Group II Davis Cup odlalelwe enkundleni ye Harare Sports Club ngempelaviki.
Lokhu bekungokokuqala ukuba ilizwe leZimbabwe liqoqe umdlalo walelizinga eminyakeni eyithoba munwe munye njalo kuzamele linqobe ele Moldova kusigaba sesibili ukuze liyale lilokhu lidlala ku Euro/Africa Group II kumncintiswano we Davis Cup.
IZimbabwe ibimelwe ngabadlali abathi u Benjamin Lock, okunguye owenelise ukunqoba umdlali we Bosnia – Herzegovina ukuze iZimbabwe ithole umklomelo owodwa, uTakanyi Garanganga, uMark Fynn kanye lo Wayne Black othe akasoze aphinde adlale njalo ngoba engasenelisi ukuncintisana labasakhulayo.
**********************
Iqembu leDynamos yilo eliphakamise inkezo yalonyaka eyeBob 91 ngemva kokunqoba elikwenze eleCaps United ngeSonto emdlalweni okuphinde kwabonakala njalo ukungaziphathi kwabalandeli bomdlalo kanobhutshuzwayo.
Iqembu leDynamos liphindisele ukudliwa elikwenziwe ngele Caps United kunkezo yeSino Zimbabwe Cup ngenyanga edlulileyo ngokutshaya iMakepekepe nge 1 kanya emdlalweni obusenkundleni yeRufaro.
Limpumela ilakho ukupha isibindi abalandeli baleliqembu phezu kwabaqeqetshi beqembu leDynamos abatsha uDavid Mandigora kanye loTonderai Ndiraya ngoba kulecele labalandeli baleli qembu abangazange bethakazelele ukuqhatshwa kwabo bethatha isikhundla somqeqetshi ophakamise isicoco seleague iminyaka emine ilandelana,uCalisto Pasuwa.
Lumdlalo ubelezehlakalo ezokujikijelwa kwamatshe lokunye okutshiyeneyo phakathi enkundleni njalo lokhu kuza ngemva kokuba kube lezehlakalo ezifanayo emdlalweni wokudinga iqembu ebelizadlala leDynamos obuphakathi kwe Caps United le Highlanders enkundleni yeBarbourfields.
***********
Sikhangele imidlalo yenguqu edlalwe kwamanye amazwe;
Elizweni leSouth Africa umdlalo omkhulu obuphakathi kweqembu elihlezi phezu kwengalane eleKaizer Chiefs lele Orlando Pirates uphele zingu tshiki lobhanqa kungela qembu elenelise ukulitshayela emambuleni.
Limpumela itshiye iqembu leChiefs likhokhela ngemiklomelo elitshumi lanye phezu kwengalane lilemiklomelo engamatshumi amahlanu lanye kuthi ngemva kwalo kuleqembu leMamelodi Sundowns elilemiklomelo engamatshumi amane ndawonye lele Bidvest Wits ikanti elePirates likundawo yesine lilemiklomelo engamatshumi amathathu lesikhombisa.
Ngase Ngilandi bekulomdlalo owodwa kuleague kulimpela viki njengoba amaqembu ebephatheke kumncintiswano weFA Cup.
Lumdlalo ngobuphakathi kweQPR le Tottenham Hotspur wona ophele iqembu leSpurs linqobe nge 2 ka1.
Elizweni leSpain iqembu leBarcelona yilo eselihlezi phezu kwengalane lilemiklomelo engamatshumi ayisithupha lambili ngemva kokunqoba elikwenze eleRayo Vallecano nge6 ka1, kwathi iqembu ebelikhokhela ensukwini ezedluleyo eleReal Madrid litshaywe ngele Athletic Club nge1 kanya okuyimpumela elitshiye lihlezi kundawo yesibili lilemiklomelo engamatshumi ayisithupha lanye.