UMnumzana David Coltart ongomunye wequla elethekelele eBhilithane phansi komanyano oweMDC T Alliance eligoqela oMnu Nelson Chamisa loTendai BIti uthi bayasuthiseka ngohambo lwabo kulelozwe lapho abahlangane leziphathamandla zikahulumende, amabandla aphikisayo, kanye lentathelizindaba ezihlolisisa ngezomnotho.
UMnu. Coltart uthi baze eBhilithane ngenjongo yokuzochasisela uhulumende weBhilithani ngamalungiselelo okhetho lweZimbabwe lwalonyaka langesimo somnotho. Ngaphandle kokubonana lomphathintambo obona ngezwekazi leAfrica uNkosazana Harriett Baldwin uColtart ulandisa ngezinye zeziphathamandla abahlangane lazo
Bekuke kwabikwa ngaphambilini ukuthi iqula lakhe lihlangane labazamabhizinisi labezomnotho, Umnunzana Coltart uthi cha akunjalo.
Uyephambili echaza ukuthi kungani ibandla lakhe lamukela uMnu Chamisa njengoMongameli womanyano weMDC T Alliance.
Umnunzana Coltart lequla lakhe leMDC T Alliance elihlanganisela uMongameli walo uMnu Nelson Chamisa loTendai Biti sebegadile indizamtshina belubhekise ekhaya njalo bathi bayasuthiseka ngohambo labo kweleBhilithane. Ingqobe sezikubo ukuthi banqobe kukhetho oluzayo bavuse ilizwe njengezithembiso zabo.
Kusenjalo, isikhulumeli somanyano weMDC Alliance uMnu. Welshman Ncube laye ugcizelela ukuthi uhambo lolu lufezile injongo yalumanyano. Uthi labo abachothoza uMnu. Chamisa, abanjengo sikhwicamfundo weBhilithane uProfessor Diane Jeater balelungelo lokwenzenjalo, kukanti bayemukela imbono etshiyeneyo ngendlela yokuzithuthukisa njengomanyano.