Kulemidlalo emibili ezadlalwa ngamaqembu omdlalo wenguqu amele ilizwe le Zimbabwe enkundleni yeBarbourfields kulimpelaviki.
NgoMgqibelo iqembu leFC Platinum lizemukela iqembu le Al Hilal elakwele Sudan enkundleni y Barbourfields emdlalweni walo owesihlanu owesigaba sezibaya kuncintiswano weTotal CAF Champions League.
Iqembu leFC Platinum lilomklomelo owodwa kuphela njalo yilo elijeke amanye kusibaya sika Group B.
Isimo lesi sitsho ukuba iqembu leli kaliselawo amathuba awokudlulela kusigaba esilandelayo esomncintiswano kodwa umqeqetshi walo omutsha uHendrikus Pieter de Jongh uthi ukhangelele ukuba iqembu lakhe linqobe okwakuqala selokhu laqala ukudlala imidlalo yezibaya.
“Konke kuhamba kuhle njalo silungiselele ngemfanelo. Sesilinde impumela enhle kusasa njalo sikhangelele ukunqoba ngoba ungakhangela indlela esidlale ngayo emdlalweni owedluleyo esiwudlale leqembu le Al Ahly sidlale kuhle okokuthi mhlawumbe kwakumele sivele sinqobe.
Ngalokho ke ngikhangelele ukuba sizanqoba kusasa,” kutsho ude Jongh.
Iqembu leFC Platinum libe ngutshiki lobhanqa 1 ka 1 leqembu leAl Ahly elakwele Gipite emdlalweni walo olandelwa yilo owango Mgqibelo okuyimpumela elitshiye lilomklomelo walo owakuqala kumncintiswano walonyaka oweTotal CAF Champions League.
Emdlalweni wakuqala odlalwe phakathi kweqembu leFC Platinum lele Al Hilal odlalelwe kwele Sudan nyakenye iqembu lezivakatshi linqobe eleFC Platinum nge 2 ka 1.
Iqembu le Al Hilal lihlezi endaweni yesithathu engalaneni yemiklomelo kusibaya sika Group B lilemiklomelo eyisithupha.
Phezu kwengalane kuhlezi iqembu leEtoile du Sahel lona elilemiklomelo eyithoba munwe munye ikanti endaweni yesibili kuhlezi iqembu le Al Ahly elakwele Gipite lona elilemiklomelo eyisikhombisa.
Komunye umdlalo weviki lesihlanu iqembu leAl Ahly lizadlala lele Etoile du Sahel ngeSonto.
Amaqembu azaqeda ehlezi endaweni ezimbili eziphezu kwengalane kuzibaya ezine yiwo azadlulela phambili kusigaba se quarter-final.
Kolunye udaba olumayelana lomdlalo wenguqu, iqembu lamankazana aleminyaka engaphansi kwelitshumi lesikhombisa elimela ilizwe emdlalweni wenguqu lizadibana lele Botswana ngeSonto enkundleni ye Barbourfields kuhlandla lesibili elomdlalo owokudinga amaqembu azakuyadlala kumncintiswano wezizwe zomhlaba.
Iqembu le Zimbabwe lingena kulumdlalo livele libhekane lomthwalo onzima njengoba linqotshwe nge 5 ka nya emdlalweni wehlandla lakuqala odlalelwe kwele Botswana emavikini amabili adluleyo.
Ukunqotshwa lokhu kudlale ukuba obengumqeqetshi waleliqembu uGarthly Chipuka elahlekelwe ngumsebenzi njalo uLangton Giwa nguye usezibambe esidukwini.
