Inhlanganiso ebona ngokuhlenga abantu abasengozini eye Red Cross ithi isiqalisile ukuncedisa imuli ezedlula amakhulu ayisitshiyangalombili-800 ezakhukhulelwa izindlu lizulu elisanda ukuna kumaviki ambalwa edluleyo endaweni izigoqela iMashonaland West, iMashonaland Central, kanye leManicaland.
Abantu laba bancediswa ngemphahla zokusebenzisa ezigoqela ingubo, isepa, ukudla, kanye lendawo zokuhlala.
Lokhu kwenzakala isiphathamandla samapholisa uChief Superintendent Paul Nyathi exwayisa abantu ukuthi bengazami ukuchapha imifula egcweleyo kanye lamabholoho alamanzi amanengi ukwenqabela izehlakalo zokugalula. Uxwayise abazali ukuthi benanzelele ukuthi abantwana badlalela endaweni ezingelamanzi amanengi ngesikhathi sonke.
Kusenjalo sixoxe loMnu. Gabriel Ndebele isiphathamandla sebandla leMDC-T eMatopo eKezi, yena othi lanxa indawo le ingatoti, izulu leli libhidlizele abanye izilimo.
