amalinks wokungena

Breaking News

Footballers Union of Zimbabwe: Abadlali Benguqu Kumele Baqaphele Nxa Bedinga Umsebenzi Kwamanye Amazwe


Thomas Sweswe

Abenhlanganiso yeFootballers Association of Zimbabwe (FUZ) ithi abadlali bomdlalo wenguqu kumele beqaphele nxa bedinga imisebenzi kwamanye amazwe.

Lokhu kungenxa yodubo olubhekane labanye abadlali benguqu abadabuka kwele Ghana abacine bethengelwa amatikiti wokugada indizamtshina yokuphindela ekhaya.

Abadlali laba babuye kwele Zimbabwe ekuqaleni kwalonyaka ngemva kokuba beqanjelwe amanga ukuba kuleqembu eliholisa imali enengi elibafunayo.

Isiphathamandla senhlanganiso ye FUZ, uThomas Sweswe, uthi abadlali kumele babe leqiniso lalokho abakuthenjiswayo bengakasuki ngakibo ukuze bengazitholi sebesesimeni esibucayi.

“Ngithanda ukukhuza abadlali ukuthi nxa befuna ukuphama phandle kumele beqale badingisise ebulenjini ukuba iqembu elibabizayo liqembu elinjani. Bayenelisa njalo ukuba bekhulume lenhlanganiso ebona ngokuqhutshwa komdlalo wenguqu elizweni kumbe lenhlanganiso emela abadlali.

Abadlali bakwele Ghana baqanjelwa amanga kwathiwa kuleqembu elilemali enengi elibafunayo eZimbabwe abazali babo bathengisa impahla yabo yonke ukuze bathenge amatikiti endizamtshina.

Sithanda ukubonga inhlanganiso ye Zifa kanye labantu ababagcinayo eChiredzi kodwa njengoba ngisitsho, abadlali kumele baqaphele nxa besebenza labantu ababaxhumanisa lamaqembu.” Kutsho uSweswe.

Abadlali base Ghana laba ngabathi uPeter Tibila, oleminyaka oyokuzalwa engamatshumi amabili lane, uFrancis Adjetey, oleminyaka eyokuzalwa engamatshumi amabili lantathu, kanye lo John Adu Poku, oleminyaka engamatshumi amabili lambili eyokuzalwa.

Bobathathu abadlali laba babuye kwele Zimbabwe ngemva kokuba bebizwe ngeyinye indoda ebabhadalise amakhulu ayisitshiya galo mbili amadola aseMelika umdlali ngamunye isithi izabahambisa eqenjini elizabathenga ngenkulungwane ezilitshumi zamadola aseMelika umdlali ngamunye.

Phezu kwalokhu lindoda ibathembise ukuba iqembu leli lizaphinda libaholise inkulungwane ezimbili ngenyanga, kusithi ngemva komdlalo bathole amakhulu amahlanu nxa bethe banqoba.

Lindoda inyamalele ngemva kokuthatha imali zalaba badlali.

Kuze kwavalwa imingcele ngemva kokuqhamuka komkhuhlane we Covid – 19 abadlali laba belokhu bese Chiredzi njalo baze babuyela kibo ngeviki eyedluleyo.

Facebook Forum

XS
SM
MD
LG