amalinks wokungena

Breaking News

Ingcwethi Labalimi Bathi Kuqakathekile Ukuvimba Ukukhudumala Komkhathi Okudala Indlala Lokunye Emhlabeni Wonke Jikelele


Bayakhala eZimbabwe ngokukhudumala komkhathi abathi kudala indlala emangalisayo.

Ingcwethi ezibona ngokukhudumala komkhathi kanye labalimi bavumelana ukuba ukuguquka komkhathi sokuhlukumeze uzulu eZimbabwe lemhlabeni wonke jikelele.

UMnu. Washington Zhakata, umqondisi wohlangothi lukahulumende olubona ngokwenzakala emkhathini, uthi abantu bathwele nzima emhlabeni wonke jikelele ngenxa yokukhudumala komkhathi okubizwa ngeSilungu ngokuthi yi-global warming.

Uthi ngakho-ke uhambo luka Mongameli Emmerson Mnangagwa eScotland luqakatheke kakhulu ngenxa yokuthi eleZimbabwe lalo lithwele nzima ngokukhudumala komkhathi.

UZhakata uthi ukukhudumala komkhathi kukhathaza abantu abanengi kakhulu eZimbabwe.

Lokhu kusekelwa nguMnu. Everson Ndlovu, ofundisa okumayelana lobunzima obubhekane lozulu kumbe iDisaster Management ekolitshini leNational University of Science and Technology.

UNdlovu uthi ukuguquka komkhathi kuphazamisa njalo umnotho kazulu kanye lowelizwe.

UMnu. Dumiani Nyoni, okuhlangothi lukahulumende olukhangelane labalimi olweAgricultural Extension Services, uyakusekela lokhu esithi bathwele nzima abalimi ngokukhudumala komkhathi.

Abalimi bavumelana lengcwethi lezi besithi kumele umhlaba wonke jikelele ulwisane lokuguquka komkhathi. Omunye wabo nguMnu. Tapson Cheda, ohlala eMatshetsheni esabelweni seMatabeleland South.

Akwaziwa ukuba inkokheli yomhlaba wonke jikelele izaphuma lani emhlanganweni lo eScotland, okunganceda uzulu othwele nzima ngokukhudumala komkhathi okudalwa yinthuthu ephuma kumafekithali, ezimoteni, lokunye okwenjiwayo.

Facebook Forum

XS
SM
MD
LG