amalinks wokungena

Breaking News

Udaba Luka Grace Mugabe Lufiphalisa Umhlangano weSADC


UNkosazana Gabriella Engels loNkosikazi Grace Mugabe.

Umhlangano weSouthern African Development Community (SADC) oqala kusasa eJohannesburg ulakho ukululazwa ludaba lukamkamongameli uNkosikazi Grace Mugabe obhekane lokubotshelwa icala lokutshaya untombazana amthole elamadodana akhe amabili ahlala eJohannesburg.

EleSouth Africa libikwa lihlela ukupha uNkosikazi Mugabe isivikelo sokuthi angabotshwa ese diplomatic immunity, kungelani lokuthi ingcitshi zomthetho ziphikisana lalokho.

Kubikwa sezikusibanga esiphezulu inkulumo phakathi kukahulumende wakweleSouth Africa loweZimbabwe ngodaba lokuthi uNkosikazi Mugabe angabotshwa ngecala abhekane lalo lokutshaya untombazana wakweleSouth Africa, uGabriella Engels.

Ibandla leDemocratic Alliance selikhuthaze uNkosikazi Grace Mugabe ukuthi athathe amaphasipoti akhe onke omabili awaphe amapholisa ukuze kube lesiqinisekiso sokuthi akasoze abaleke.

Sekuvele imibiko ethi inkulumo seziseduze lokuphela njalo iSouth Africa ikhangelelwe ukuvuma ukunikeza unkosikazi Mugabe uxolo, phansi kwesivikelo esiphiwa izisebenzi zikahulumende ezethekelela amanye amazwe zimele uhulumende wazo, esediplomatic immunity.

Le yinto ekhanya ezadala ukuxokozela njengoba ingcitshi kwezommthetho zisithi lokho kuyabe kuyikuphambana lomthetho njengoba uNkosikazi Mugabe engene elizweni esebenzisa iphasipoti engasiyo leyo emvikelayo.

Kusenjalo, inkokheli zamazwe asemhlubulweni wangezansi kwezwekazi leAfrica aweSADC seziqalisile ukutheleka kweleSouth Africa zizongena umhlangano wamalanga amabili oqhutshelwa esigodlweni ePretoria.

UMongameli Mugabe ngomunye wenkokheli esezikhona ezilande umhlangano lo. Udaba olusemqoka emhlanganweni walonyaka yikuthi amazwela angasebenza njani lamankampani azimeleyo ekuthuthukiseni umnotho wawo.

Kuzaxoxwa njalo ngamanyathelo asethethwe ekuletheni ukuthula eLesotho ngemva kodlakela olukhokhelele ekuthini kuqhutshwe ukhetho olusanda kwenzakala.

Akukho okusetafuleni okuzakhulunywa ngeZimbabwe lobanje kukhangelelwe ukuthi iSADC yaziswe ngokhetho oluzaqhutshwa ngomnyaka ozayo.

Kodwake izizalwane zeZimbabwe zithi akukho ngitsho lokukodwa osekwenziwe yiSADC ukusiza lelozwe enkingeni zezombusazwe ezihluphayo esezileminyaka ethile kusukela ngo 2000.

Isizalwane seZimbabwe, uMnu. Mlungisi Tshabalala, uthi alukho usizo iZimbabwe ezaluthola kuSADC.

“Angiboni mpela ukuthi kukhona okuzaba lotshintsho khona ngoba ma uthi uyakhangela iSwaziland layo yathi ingena abantu baba lama high hopes manje iSouth Africa vele iyaziwa ukuthi from the time of uThambo Mbeki iquiet diplomacy ngeyabo. So akulanto ezayenzeka vele ngama issues eZimbabwe.”

Le yinto engcizelelwa ngesinye isizalwane seZimbabwe, uMnu. Mlamuleli Moyo, yena othi ezinye zenhlupho ezihanqe iZimbabwe khathesi zabangelwa yikumbambatha umumo kweSADC.

“Kunjenje sigcwele emazweni sigcwele iganga lonke iSADC iluma iphozisa. Abalaqiniso benza sengathi bayalungisa kukanti konakala ngamandla ngoba bathi izinto zi fair eZimbabwe yet akulanto e fair kugcwele icorruption lokhu lalokhuyana okunga kufika leli thuba sekulungisiwe kodwa lokhe kuqhubeka ngamandla.”

Ngakolunye uhlangothi omunye njalo weZimbabwe, uNkosazana Velile Dlodlo, uthi yena ulalo ithemba lokuthi eleSouth Africa lizathatha amanyathelo okusiza eleZimbabwe.

“ISADC ayikaze isisize ngalutho thina. So, iSouth Africa siyacabanga ukuthi ingasisiza ngoba yiyo ebheke uhlupho lwethu. Noma sisezinkingeni sibalekela la. I think labo bazozama ngazo zonke indlela ukuthi basisize sibuyele ekhaya labo bathole ukuphumula.”

Kusenjalo, umanyano wenhlanganiso zamazwe eSADC ozibiza SADC Democracy Forum, uthi amalunga awo azatshengisela kusasa ngoba lawo engasuthiseki ngendlela iSADC ekhokhela ngayo.

Bathi izwekazi ligcwele ngokwephulwa kwamalungelo oluntu kugoqela laseZimbabwe. Bathi lobanje ukuhlukunyezwa kwentathelizindaba labamabandla aphikisayo sekuqalisile phambi kokhetho lomnyaka ozayo eZimbabwe, iSADC izavala amehlo lendlebe ize iyevumbuluka isisithi ukhetho belukhululekile.

ISouth Africa ikhangelelwe ukuthatha isihlalo sokukhokhela linhlanganiso ebesiphethwe yiSwaziland.

Abanyeke bathi iSouth Africa nxa izimisele ukuthi ekungeneni kwayo akusoke kwephulwe amalungelo oluntu emazweni aweSADC, kufanele ivume ukuthi uNkosikazi Grace Mugabe abhekane lomthetho ngecala lokutshaya kabunhlungu owesifazana wakwele South Africa.

Facebook Forum

XS
SM
MD
LG