Umphathintambo kahulumende obona ngamandla amagetsi uMnu. Jorum Gumbo uthi abantu abafuna ukuzinothisa ngesiphange-phange yibo ababangela ukuthi kube lokusilela kwamafutha ezimota awokuhambisa.
Lokhu kwenzakala inengi labantu lisithi alenelisanga ukwethekelela abangane lezihlobo ngalelikhefu lekhisimusi ngenxa yokuswelakala kwamafutha ephethulo kanye lawedizili.
Abanini bamabhasi babikwa sebekhweze intengo ebhadalwa ngabantu nxa bewagada ngoba besithi labo bathola ingcosana emagalajini, besebethenga amanye emkambo wensitha ngentengo ephezulu.
UMnu. Gumbo uthi amafutha ezimota kwele Zimbabwe alentengo ephansi kakhulu kuhlangothi lweSouthern African Development Community (SADC) okubangela ukuthi inengi labantu abavela kwamanye amazwe bawathenge ngabunengi bawo.
Uchasisa ezinye izizathu ezimbalwa athi zibuyisela imizamo kahulumende emuva, kanye lazakwenza ukuxazulula loluhlupho ngomnyaka ozayo.
