Imuli yesikhosini yakweleBhilithane ilomkhosi omkhulu lapho inkosana uHarry azabe etshada lentombi yakhe engumdlali wokulingisa uNkosazana Meghan Markle eSt Georges Chapel eWindsor okuyisigodlo sendlovukazi uQueen Elizabeth.
Amalungiselelo omcimbi lo asekusibanga esiphezulu njalo ahamba kuhle lanxa uyise kaNkosazana Markle uMnu. Thomas Markle waseMelika elakho ukungabi khona.
Inkulungwane lenkulungwane zabantu zikhangelelwe ukuma ezitaladeni zeWindsor kuyikufuna ukuthi tshazi ababili laba abatshadayo ngoMgqibelo kukanti izigidi lezigidi zizabukela kumabona kude emhlabeni wonke jikelele.
Abanxusiweyo kulumcimbi banengi njalo bagoqela abantu makhaza lenhlanganiso eziphathisa uzulu kodwa inkokheli zamazwe womhlaba labezombusazwe azinxuswanga.
UNkosazana Beverly Shumba oleminyaka elitshumi lanhlanu oyisizalwane seZimbabwe njalo esebenzela inhlanganiso yabasakhulayo iStoke On Trent ngomunye wabanxusiweyo emtshadweni
Ugogo uVelile Nkomo uthi kanxuswanga kodwa uzatotobela khona njengabanengi ngoba engumsekeli omkhulu wemuli yesikhosini.
“Senzela uPrince Harry amhlophe loMeghan hayi siyabonga kakhulu Prince Harry.Siyamthanda kakhulu uPrince Harry ngoba usebenzelana le Africa and njalo unina wayevele uLady Diana sasimthanda ngobawayesebenzela iAfrica,siyakubonga konke lokhu.Kabuye kangene ekhaya uMegan njalo futhi kuhle kunjalo ngoba u Megan ngumuntu omnyama wangithi.Thina siyabe sikhona emtshadweni hayi kuyabe kukuncane indawo siyabe sijayiva,” kutsho uMaNkomo.
UMnu. Khumbu Mlilo wamukela ngokuthokoza okukhulu ukuthi inkosana uHarry utshada loMeghan emletha emulini yesikhosini yena engonsundu esiba ngowakuqala umuntu omnyama ukwendela kulimuli:
“Kungijabulisile kakhulu ukuthi sokungena umuntu omnyama kuRoyal Family kuyinjabulo enkulu kakhulu.Lami ngilesifiso esikhulu kakhulu esokuthi ngiyefika khonangale ngibone iprocession yakhona phela bekungela muntu okade ekucabanga ukuthi kungenzeka ukuthi umuntu omnyama laye abekhona kuRoyal family khonangale eBeckingham Palace hayi kuyasijabulisa impela lokhu.”
Abasemahofisini wommeli weZimbabwe kweleBhilithane batshele iStudio 7 ukuthi abanxuswanga emtshadweni lo njalo bacabanga ukuthi isizatho yikuthi akukabi lommeli osemthethweni yikho nje benganxuswanga.
Akubizwa ozwayo ngoMgqibelo, uzulu wonke usemelele ilanga elikhulu, kukhanya kuzabamnandi okuboniswa yikunyakazela kwabalungiselela lumtshado abanjengabamaluba, abacecisa indawo, abeviyo lebutho elilinda imuli yesikhosini, kanye labaphekayo.
