amalinks wokungena

Breaking News

Inengi Litshengisa Imbono Etshiyeneyo Ngokuqakatheka kweHeroes Day


Heroes Acre

Inengi lithi uhulumende weZANU PF kumele athathe ithuba lokunanza iHeroes Day ahlolisise indlela zokuthuthukisa umnotho welizwe ukuze abantu bathole imfundo, indawo zokuhlala, imisebenze, ezempilakahle, lokunye.

Inengi lithi kufanele uhulumende webandla leZANU PF kumele athathe ithuba lokunanza ikhefu lokujabulela amaqhawe akhulula ilizwe eleHeroes Day ahlolisise indlela zokuthuthukisa umnotho welizwe ukwenzela ukuthi abantu bathole imfundo, indawo zokuhlala, imsiebenze, ezempilakahle, lokunye.

Abavela ezigabeni zemaNdebeleni asebeke bafuqwa ngezinye zezizatho ezinengi ezenza ukuthi abantu bakulo umhlubulo bahlale bezithola sebese Harare bengaqondile ngenxa yokufuna ukulungisa leli loba leliya iphepha bayayazi intaba emi eceleni komgwaqo malungana nje lomuzi we Kuwadzana nxa usungena koBambazonke ngoba kunengi okudonsa amehlo esihambi okuphezu kwayo.

Kule intaba, yona eyaziwa namhlanje ngokuthi yi National Acres, kulele obaba labomama balelilizwe abafa belwela inkululeko eyatholakala ngo1980 lanxa nje sekukhona abanye ababekwe lapho eminyakeni esanda kwedlula abangena lapho batshiya uzulu exokozela ezibuza ukuthi kambe ngabe balenzelani leli okungenza ukuthi bayephumula ndawonye labokokho besizwe.

IStudio 7 ingene phakathi kukazulu yathola esithi ilanga lamaqhawe esizwe lalonyaka liza ngoMvulo nje lithola abantwana beZimbabwe abazahlala bewabonga amaqhawe anikela impilo yawo ekukhululeni ilizwe.

Kodwa okwamanje sebecela uhulumende acabangisise amaqhinga azahlenga abantu kunhlupho ezibalisela ubuyanga obuyaphambili, ukusweleka kwemisebenzi, izindlu, imfundo, ezempilakahle kanye lenkululeko yokuzikhethela ukuphatheka kwezombusazwe ngaphandle kwebandla le ZANU PF.

KuMnumzana Clever Ncube, yisakhamuzi somuzi we Sizinda koBulawayo esamiswa umsebenzi eminyakeni emihlanu edluleyo. Yena uthi kuyabongeka konke okwenziwa ngamaqhawe esizwe eletha inkululeko kodwa uzulu usesekude lelizwe loluju lochago alithenjiswa nguMongameli Robert Mugabe mhla ethatha umbuso ngo 1980.

Umnumzana Nathan Magwenzi yisakhamuzi semzini wabanengi weTshabalala esizazibala kwabalenhlanhla yokusala besebenza ngesikhathi sekufungwa ngawo umsebenzi edolobheni. Uthi yebo inhle inkulululeko eyalethwa ngamaqhawe akhulula isizwe kodwa uzulu uzithola esephila emalahleni njalo ngaphansi kombuso we ZANU PF.

Unkosikazi Anelisiwe Mpabanga yena yisesebenzi sogatsha lukahulumende lwezabatsha osebenzela kunhlelo zokulwisana lengculazi emaphandleni ase Mzingwane ezansi kwemaNdebeleni. Yena uthi inhle inkululeko yelizwe kodwa kusamele ibonakale ngokuthuthukiswa kwempilo kazulu lokuvulwa kwamathuba emisebenzi.

UMnumzana Ncube uthi inkululeko yelizwe iyinhlekisa kakhulu koBulawayo lapho amankampani asevala phose nsukuzonke etshiya abantu abaleminyaka bengatholi iholo. Uthi okwamanje isimo esisemafekithali asaseleyo sibi okokuthi uhulumende kumele abone amaqhinga masinyane ukuze idolobho lingavalwa ngamahlahla.

UMnumzana Lubinda yena uthi akaboni ukuthi ikusasa yelizwe leli isasele ezandleni zebandla le ZANU PF njalo okungcono yikuthi lidlulisele izintambo zombuso kwabanye abazaqinisa ukuthi uzulu owabambisana labalweli benkululeko azithole laye izithelo zenkululeko.

EleZimbabwe linanza usuku lwamaqhawe ngesikhathi isimo somnotho sisiba sibi njalo ababona ngezomnotho besithi lanxa wanqoba okungelambuzo kukhetho lomnyaka oluphelileyo olwaba lokuxokozela, uhulumende kaMongameli usephelelwe ngamaqhinga okuvuselela umnotho welizwe. Ko Bulawayo amafekithali aqhubeka evala kanti amanengi asebolekiswe zinkonzo zesivukevuke ezidinga izindlu zokukhonzela.

Ibandla le Zanu PF linanze ukunqoba kwalo kukhetho lomnyaka ophelileyo ngeviki ephelileyo ngasikhathi sinye ontanga belinye lamacele e MDC-T betshengisela besithi bekhonona ngokuthi i ZANU PF isiyehlulekile ukugcwalisa izithembiso zentuthuko lezomnotho elazenza likhankasela ukhetho.

Phakathi kwalezi, ibandla leli lalithembise ukuvuselelwa ngokuphangisa kwamafekithali akoBulawayo, kodwa abacubungula ezombusazwe bathi lizananzwa njalo ilanga lamaqhawe esizwe lomnyaka ozayo zilokhu zingagwaliswanga lezozithembiso.

UThabang Mathebula Uyalandisa
please wait

No media source currently available

0:00 0:05:59 0:00
Lapho esitholakala khona

USithandekile Mhlanga weStudio 7 uxoxe loMnu. Maqhawe Moyo weSilobela, kanye loMnu Okay Ndlovu we Gwanda, ukuze sizwe ukuthi balinanze njani lelilanga le Heroes Day.

Ingxoxo LoMnu. Okay Ndlovu Kanye LoMnu. Maqhawe Moyo
please wait

No media source currently available

0:00 0:03:06 0:00
Lapho esitholakala khona

XS
SM
MD
LG