Umthethwandaba weHigh Court uthi ubukhokheli buka Mnu. Nelson Chamisa kubandla leMDC abukho emthethweni.
UMahluli uJustice Edith Mushore wethule isinqumo lesi ngoLwesithathu esithi sokumele kwenziwe umhlangano weExtra-Ordinary Congress phakathi kwenyanga wokukhetha inkokheli entsha kubandla leMDC kusetshenziswa izigaba ezazikhona ngomnyaka ka2014.
Isinqumo lesi senziwe ngesikhathi ibandla leli lilungiselela umhlangano omkhulu wokukhetha inkokheli ozakwenzelwa eGweru kusukela mhlaka 24 kusiya umhlaka 26 ngoNkwenkwezi.
UJustice Mushore uthe uChamisa loMnu. Elias Mudzuri bakhethwa ngumuyi uMorgan Tsvangirai ngendlela engaqondanga.
Isikhulumeli seMDC, uMnu. Jacob Mafume, uthe uzaqhubekela phambili umhlangano loba umthethwandaba uthethe isinqumo lesi.
Udaba lolu lukhwenzwe emthethwandaba nguMnu. Elias Mashavire odabuka eGokwe ongaphansi kwenhlanganiso ebizwa ngokuthi yiDefending Morgan Tsvangirai Legacy.
Obona ngezemibiko kunhlanganiso le, uMnu. Webber Chinyadza, uthe basemukela ngenjabulo sinqumo lesi.
Kodwa enye ingcwethi kwezombusazwe, uMnu. Wellington Gadzikwa, uthe sinqumo lesi siphuzile ukwethulwa ngoba kwakumele sethulwe phambilini kokhetho olwenziwa nyakenye.
Ibandla leMDC-T lithi isinqumo lesi siveza ukuthi uChamisa wathatha isikhundla sikamongameli weMDC ngenkani.
