Umthethwandaba weHigh Court ngoLwesithathu ulaye umkhokheli wenhlanganiso yezinduna, iZimbabwe Council of Chiefs uMnu Fortune Charumbira ukuthi axolise phezu kwamazwi akhe okuthi izinduna zonke zizavotela ibandla leZanu PF kukhetho oluzayo.
UCharumbira wamangalelwa yinhlanganiso yeElection Resource Center ngemva kokukhuluma amazwi la enyangeni ezedluleyo.
Esethula isinqumo sakhe, umahluli weHarare uJustice Phiri uthe uCharumbira wephula umthethosisekelo welizwe wona othi inkokheli yosiko kayimelenga ingenele kwezombusazwe.
Ngakho, uthe uMnu Charumbira kumele axolise phakathi kwamalanga ayisikhombisa alandelayo.
UJustice Phiri ulaye njalo ugatsha olubona ngokwakhiwa kwezabelo (Ministry of Local Government), oluyilo olubona ngendaba zezinduna ukuthi lujezise uCharumbira.
Esikhathini esinengi abakhokheli bomdabu, abagoqela abalisa, osobhuku kanye lezinduna, basetshenziswa libandla leZanu PF ukwethusela uzulu ikakhulu nxa kuyiwa kukhetho.
Isiphathamandla senhlanganiso yeElection Resource Center uMnu Useni Sibanda utshele iStudio 7 ukuthi bayathokoza kakhulu ngesinqumo senkantolo.
