Idale le High Court ngoLwesine linqume ukuba uNkosikazi Grace Mugabe asuke ezindlini azithathela isizalwane se Lebanon, uMnu. Jamal Ahmed, ngemva kokuthengiselwa indandatho elentengo yamadola ayisigidi esisodwa, i$1,3 million.
Umahluli wedale leHigh Court eHarare, uJustice Clement Phiri, uthe uNkosikazi Mugabe kumele asuke ezindlini ezintathu azihluthunayo aphinde abuyisele lezisebenzi ezaxotshwayo emizini le.
Igqwethi lika Nkosikazi Mugabe, uMnu. Wilson Mnase, walile ukukhuluma le Studio 7. UNkosikazi Mugabe usuke elizweni leZimbabwe izolo lomkakhe belubhekise eSingapore kukhefu likaMugabe alithatha minyaka yonke ngales’isikhathi.
Umnu. Ahmed umelwa nguNkosikazi Beatrice Mtethwa. UNkosikazi Mugabe wahluthuna lezi zindlu esithi wayengasayifuni indandatho kodwa esefuna imali yakhe. UMnu. Ahmed uthi imali iselizweni leDubai njalo umthetho awuvumi ukuthi ayithumele eDubai njengokufuna kukaNkosikazi Mugabe.