amalinks wokungena

Breaking News

HRW: Uhulumende Wazidalela Ngabomo Uhlupho OluseTokwe Murkosi


Bhasikiti

Inhlanganiso le ithi uhulumende nguye owavala amagedi womduli wedamu le Tokwe Murkosi eMasvingo okwenza amanzi acine egcwala adiliza umduli asegelezela ebantwini hatshi izulu.

Inhlanganiso elwela ilungelo loluntu eye Human Rights Watch ithi akusoqiniso ukuthi umduli wedamu le Tokwe Murkosi eMasvingo wadilika ngenxa yezulu lesikhukhula ngoba uhulumende nguye owavala amagedi ukwenzela ukuthi amanzi agcwale aze agelezele ebantwini.

Inhlanganiso le ithi uhulumende, yena owayefuna ukuthi abantu abahlala kulindawo besuke kusukela ngomnyaka ka 1998, wayefuna ukuthi bethuthe ngesiphangi-phangi ngaphandle kwembadalo yemali lomhlabathi wokuthi bakhe kutsha. Iqhubeke yathi uhulumende ufuna abantu laba belime itshukela epulazini le Nuanetsi Ranch lapho abanye abalokhu besala ukuya khona, besekuhlaliswa inyamazana endaweni eduzane le Tokwe Murkosi.

IHuman Rights Watch iqhubeka isithi amanzi la, awadilizela abantu izindlu athatha lezifuyo, ayenza kwaba lula ukuthi uhulumende asuse abantu abayzinkulungwane ezingamatshumi amabili- 20 000 kulindawo, njalo khathesi baswela ukudla lokunye okokusebenzisa eChingwizi, lapho abasahlaliswe khona.

Inhlanganiso le ithi abadilikelwa yizindlu bafakaza ukuthi amasotsha abasusa kulindawo abatshela ukuthi athunywe nguhulumende njalo lezinye izisebenzi zenkampani ayayisakha lelidamu eye Salini Impegilo JVC zathi ngempela juhlupho lolu lwasalwa ngabomu.

Kodwa isiphathamandla sikahulumende uMnu. Kudakwashe Bhasikiti ulandule lokhu kuStudio 7 esithi indawo le ihlala ilamanzi njalo uhulumende wenza yonke imizamo yokuthi agcwaliso indengeko zabantu.

Ukuhlaziya loludaba, uSithandekile Mhlanga weStudio 7 uxoxe loMnu. Morris Ngwenya ingcwethi ecubungula ezombusazwe, njalo esekela ibandla le ZANU PF, endawonye lo Mnu. Ekem Moyo, isiphathamandla secele leMDC-T eGwanda, onguye osungula lingxoxo.

UMnu. Ngwenya oyalandula imbiko ye Human Rights Watch kodwa uMnu. Moyo uthi kungenzeka ukuthi ingaba liqiniso nxa kukhangelwa imbali yebandla leZANU PF eyokungananzi amalungelo oluntu.
please wait

No media source currently available

0:00 0:06:08 0:00
Lapho esitholakala khona
XS
SM
MD
LG