amalinks wokungena

Breaking News

I-Black Rhinos Isikusibanga Sesine Engalaneni eyePSL


Imidlalo eyeCastle Lager Premier Soccer League.

Umqeqetshi weqembu lomdlalo wenguqu ele Black Rhinos uHerbert Maruwa uthi lonyaka leliqembu lingaba ngelinye lamaqembu alwisa ukuphakamisa isicoco se Castle Lager Premier Soccer League.

Iqembu le Black Rhinos liphakame layahlala endaweni yesine engalaleni yemiklomelo, lilemiklomelo engamatshumi amabili lanye ngemva kokutshaya ele TelOne ngeSonto.

Lokhu kutsho ukuba iqembu leli litshiywa ngomklomelo owodwa ngamaqembu ahlezi phezu kwengalane abalisa ele Chicken Inn kanye lele CAPS United njalo lilingene ngemiklomelo leqembu le FC Platinum okuyilo intshantshu zanyakenye.

Ekhuluma lentathelizindaba zemidlalo ekupheleni komdlalo weqembu lakhe lele TelOne umqeqetshi weqembu le Black Rhinos uHerbert Maruwa uthe yena injongo yabo lonyaka yikuba baqede bephezu kwengalane yemiklomelo.

Kumele siqede lathi siphethe okuthile lonyaka. Kumele siqede lathi sisendaweni ezine eziphezu kwengalane njalo phezulu kungaba yindawo yesine, eyesithathu, eyesibili kumbe siqede siphezu kwengalane.
Akwaziwa okungenzakala ikakhulu nxa amaqembu ahlezi phezu kwethu angaqhubekela phambili elahla imiklomelo.

Iqembu elihlezi phezu kwengalane ele Chicken Inn litshaywe nge 2 ka 1 ngele Harare City ngoMgqibelo kwathi ngosuku olufanayo iqembu elihlezi endaweni yesibili ele CAPS United litshaywe nge 3 ka 1 ngele Herentals ikanti ele FC Platinum lona libe ngutshiki lobhanqa 0 ka 0 lele Ngezi Platinum Stars.

Kusenjalo iqembu le Highlanders litshelele labuyela layahlala endaweni yesine nxa usuka emsileni wengalane yemiklomelo ngemva kokuba linqotshwe nge 1 ka nya ngele Yadah ngoMgqibelo. Iqembu le Highlanders lilemiklomelo elitshumi lanye.

Amanye amaqembu ahlezi endaweni ezine ezisemsileni wengalane ngabalisa ele Yadah lona elihlezi endaweni yetshumi lesithupha njalo elilemiklomelo eyithoba munwe munye, ele Mushowani Stars elihlezi endaweni yetshumi lesikhombisa lilemiklomelo eyithoba minwe mbili kanye lele Bulawayo Chiefs okuyilo elihlezi emsileni lalo lilemiklomelo eyithoba minwe mbili njalo elitshaye ele Yadah nge 2 ka 1ngeSonto.

Kolunye udaba olumayelana lomdlalo wenguqu iqembu labesilisa elizamela ilizwe le Zimbabwe kumncintiswano walonyaka owokudinga intshantshu zezwekazi lase Africa libe ngutshiki lobhanqa 0 ka 0 leqembu elimela ilizwe le Nigeria emdlalweni wokuzwana amandla oqhutshelwe elizweni lase Nigeria ngoMgqibelo.

Iqembu lase Zimbabwe leli elaziwa kakhulu ngegama elithi Warriors lizaqhubekela phambili lizilolonga liselizweni lase Nigeria okuyikho elizasukela khona selibhekisa amabombo elizweni lase Egypt lapho okuzaqhutshelwa khona imidlalo yalonyaka eyomncintiswano we Africa Cup of Nations.

Umncintiswano lo ukhangelelwe ukuqala mhla zingamatshumi amabili lanye kuyonale inyanga kaNhlolanja usiyafika emaphethelweni mhla zilitshumi lathoba munwe munye kunyanga kaNhlangula.

please wait

No media source currently available

0:00 0:02:33 0:00

Facebook Forum

XS
SM
MD
LG