amalinks wokungena

Breaking News

ICOVID-19 Iphazamisa Ukulungiswa Kwenkundla Zenguqu eZimbabwe


Isikhulumeli senhlanganiso yenguqu eyeZIFA uXolisani Gwesela
Isikhulumeli senhlanganiso yenguqu eyeZIFA uXolisani Gwesela

Isikhulumeli senhlanganiso ebona ngezomdlalo wenguqu eye Zimbabwe Football Association, uXolisani Gwesela, uthi ukuqhamuka komkhuhlane weCOVID 19 kuphazamise ukulungiswa kwenkundla yeBarbourfields kanye leye National Sports.

UGwesela ubekhuluma ngesikhathi kuzokhangelwa umsebenzi osuqhutshwe enkundleni yeBarbourfields phambilini kokuba linkundla izohlolwa ngenyanga kaNhlangula ngabe First Instance Body.

“Sithe sifike lapha eBarbourfields sizobona ukuthi kuyini osokulungisiwe njalo kuyini abangakulungisisa njengoba lisazi ukuba abe CAF bake babuya lapha kunyanga eziphelileyo bezokhangela ukuba kuyini okungalungisiswa ukuze linkundla ibe sesimeni esikhangelelwe ukuba inkundla yakulezinsuku ibekuso. Lapha sizikhangela nje kuphela sisipha lembono yethu kodwa khona sizabuya sesizohlola ekuqaliseni kukaNhlangula sesizohlola sesilabe First Instance Body,” kutsho uGwesela.

Izinto okumele zilungisiswe ukuze inkundla yeBarbourfields ivunyelwe ukudlalelwa imidlalo yezinga laphezulu ngezigoqela ukuba utshani enkundleni kumele buhlale buluhlaza tshoko, amakamelo okutshintshela abadlali kumele aqheliswe, indawo ezihlala intathelizindaba kumele zilungiswe kuthi lamasango okungena ngawo izibukeli kumele abengawegesi.

UGwesela uthi umsebenzi wokulungisisa lokhu usuke waphazamiswa yikuqhamuka komkhuhlane we COVID 19.

“Siphazamiswe ngumkhuhlane we corona virus umsebenzi wasuphuza ukuba uqediswe ngesikhathi. Kodwa labe CAF sabatshela ukuthi njengoba libona umkhuhlane lo usumemetheke kangaka lathi ususihlaselile kodwa sizazama ukuthi silungise,” kutsho uGwesela.

Ngemva kokuhlolwa kwenkundla yeBarbourfields kanye leye National Sports okuzaqhutshwa ekuqaleni kwenyanga kaNhlangula abenhlanganiso ye ZIFA bazabhalela abenhlanganiso ye CAF bebanxusa ukuba bazozibonela lezonkundla ukuze batsho ukuba sezilungele loba hatshi ukudlalelwa imidlalo yezinga laphezulu.

Okwakhathesi zombili lezonkundla zivunyelwe ukuba kungadlalelwa kuzo imidlalo yamaqembu abasakhulayo kanye leqembu labesifazane elama Mighty Warriors.

Phambilini kokuqhamuka komkhuhlane weCOVID 19 iqembu lama Warriors bekumele lidlalele imidlalo yalo yangekhaya emazweni angomakhelwane ngoba inkundla zakuleli zitholakale zingekho esimeni esihle.

XS
SM
MD
LG