Umanyano wamazwe awezwekazi leEurope oweEuropean Union uthi uzaqhubeka wethese uMongameli Robert Mugabe izijeziso zenotho labanye bakhe kuZanu PF abalokhu besephula amalungelo kazulu.
Kodwa umanyano lo uthi uzakwesula iziphathamandla zalelibandla ezingamatshumi amahlanu lanye, 51 kuluhlu lwawo lwezijeziso.
Uthi njalo ilizwe lizaqhubeka lingavunyelwa ukuthenga izikhali emazweni aseEurope. Kulamankampani angamatshumi amabili azakwesulwa lawo kuluhlu lwezijeziso.
Iziphathamandla zeZanu PF ezedlula ikhulu, 112 zizaqhubeka zetheswe izijeziso lamankampani alitshumi lanye. I EU ithi izakwazisa amabizo abakhitshiweyo kuluhlu lwezijeziso ngolwesihlanu.
Isikhulumeli seZanu PF uMnu Rugare Gumbo uthi bafuna i-EU yesule zonke izijeziso. Kodwa ingcwethi ecubungula ezombusazwe uMnu Effie Dlela Ncube uthi kavumelani lalokhu.
