amalinks wokungena

Breaking News

Human Rights Watch: IZimbabwe Kayikalungeli Ukhetho Olukhululekileyo


Okwenzakala kukhetho olwenziwa ngomnyaka ka2008.

Inhlanganiso ebona ngokulondolozwa kwelungelo loluntu emhlabeni jikelele eyeHuman Rights Watch ithi iZimbabwe kayikakulungeli ukuqhuba ukhetho olukhululekileyo, ngoba kunengi okusamele igcwalise andubana yenze lokho okugoqela ukulandelwa kwesisekelo sombuso.

Lokhu kwethulwe yiziphathamandla zale inhlanganiso emhlanganweni wabezindaba eJohannesburg, zikhuthaza inhlanganiso ye SADC, ezaqhuba umhlangano wayo eSouth Africa, ukuthi imise ukuhlukunyezwa kwamalungelo oluntu eZimbabwe lakwamanye amazwe e Africa.

Inhlanganiso yeHuman Rights Watch ithi ukungalandelwa kwesisekelo sombuso esitsha lokusetshenziswa kwengatsha zikahulumende njengengatsha zeZanu PF kutsho ukuthi ukhetho lweZimbabwe ngomnyaka ozayo luyabe lungakhululekanga.

Njengobake iSADC izaqhube umhlangano wayo kweleSouth Afric liviki, umqondisi enhlanganisweni ye Human Rights Watch ezansi yezwekazi le Africa umnumnzana Dewa Mavhinga, uthi linhlanganiso ilomlandu wokubamba ngamandla iZimbabwe ukuthi inhloniphe amalungelo oluntu.

"Sibona amapholisa, amasotsha lama CIO, bonke bafuna uMugabe kuphela abafuni ama opposition. Nxa kunjalo siyabona ukuthi abantu bazotshaywa. I ZEC iZimbabwe Electoral Commission layo futhi ihamba loMugabe le Zanu PF. Abakwanisi ukuthi benze lokhu okusemthethweni."

Unkosikazi Mausi Segun laye oyisiphathamandla sale inhlanganiso, uthi ukusetshenziswa kokudla njengesikhali sokuthi abalambayo bavotele iZanu pf ngokunye ukwephula amalungelo oluntu. Unkosikazi Segun uthi enye into abakhathazeke ngayo, elakho ukubangela ingxabangxoza lokuphulwa kwamalungelo oluntu elizweni, yimpilakahle kamongameli Mugabe.

"Nxa sikhuluma ngeminyaka yokuzalwa kamongameli lempilakahle yakhe, sikhangela ukuthi lokhu kuncindezela njani amalungelo oluntu lweZimbabwe, ilungelo lokuzikhethela umuntu abamfunayo, ilungelo lokuhlala elizweni elokuthula. Akucabange ukuthi yini engenzakala nxa umongameli Mugabe engavuka eseGula okwedlulisa amalawulo."

Esekhuluma ngodlakela olwenzeka manje eZimbabwe kugoqela ukutshiswa kwezindlu, lokutshaywa kwamalunga amabandla aphikisayo, umnumnzana Mavhinga uthi lokhu kuzabangela ukwesaba ebantwini basekusephula ilungelo labo lokuvotela umuntu abamfunayo. Ubuye futhi wasola kakhulu udlakela oluphuma ngitsho lasemabandleni aphikisayo kugoqela ele MDC.

"Thina sithi uyabona I violence asiyifuni. Njalo njalo iviolence yenza ukuthi ama elections angahambi kuhle. I violence evela ku MDC, evela ku Zanu pf lamapholisa labanye, asifuni iviolence. Umuntu wonke kumele athi I violence asiyifuni."

Kulumbiko inhlanganiso le ibuye yasola njalo amazwe abalisa I Angola, iMozambique kanye leSouth Africa isithi lakula mazwe kukhona ukwephulwa kwamalungelo oluntu. ISADC yona ikhangelelwe ukuqhuba umhlangano wayo kusukela ngolweSine besekusithi mhlaka 19 lo 20 kube ngumhlangano omkhulu ongenwa ngomongameli bamazwe asezansi yezwekazi le Africa.

Facebook Forum

XS
SM
MD
LG