Inhlanganiso ephathisa amazwe omhlaba ngemali eye International Monetary Fund isikhuthaze uhulumende weZimbabwe ukuthi ayivumele ingenele ngokujulileyo emizameni yokulungisisa umnotho welizwe ukwenzela ukuthi yesule isikwelede seZimbabwe esedlula US$7 billion.
I IMF ithi ifuna ukuncedisa uhulumende ngokusungula uhlelo oluthiwa yiStaff Monetaring Program oluzakwenza iZimbabwe yenelise ukuqoqa inhlelo zayo zokuthuthukisa umnotho. AbeMDC babikwa beyisekela linkuthazo, kodwa abeZanu PF bathi kabafuni kuzwa ngalokhu.
Ingcwethi ecubungula ezombusazwe uMnu Mandlenkosi Gatsheni yena othi uhlelo lwe IMF lolu ngeke lwamukeleke ngoba abantu besesaba ukuthi lungaphazamisa iZimbabwe njengohlelo lweEsap olwalethwa yiyo njalo iIMF eminyakeni edluleyo.
Kunjalo nje, umsekeli wenhloko kahulumende uMnu Arthur Mutambara useGhana lequla labosomabhizimusi kanye leziphathamandla zikahulumende emhlanganweni weGhana-Zimbabwe Business Forum ojonge ukuthuthukisa ezamabhizimusi phakathi kwamazwe womabili.
