Isigaba sakoBulawayo kubandla leMDC sesilobele idale leNational Executive Committee yalelibandla sikhalaza ukuthi ukhetho olwabeka inkokheli yalesi isigaba esikhundleni kufanele ludilizwe ngoba kwakulokuqilibezela okukhulu.
Ngalokhu, ibandla leli likhethe ikhomithi eyokucubungula loludaba.
Abalobe lolugwalo, lona olusezandleni zeStudio 7 ngabanqotshwayo kulolukhetho ababalisa oMnumzana Phelela Masuku, Edious Shumba, Charles Moyo, Percy Tapela, Thamu Ncube, Dingilizwe Tshuma, Edwin Ndlovu, Mbuso Siso, Samuel Munsaka kanye loboNkosazana Sinikiwe Mutanda, Jasmine Toffa lo Stella Ndlovu.
Bathi kwezinye izigaba, ezinjengeMpopoma, abantu bavinjelwa ukuncintisa kulolukhetho ngakho akwenelanga okuthiwa yi quorum, futhi amavoti awabalwanga kuhle. Bathi njalo owayengumqoqi wenhlelo uProvincial Organizaing Secretary uMnu. James Sithole kanye lomsekeli wakhe uNkosazana Helen Zviviri babethatha uhlangothi.
Basola umqoqi wenhlelo zalelibandla uMnu. Amos Chibaya ngendlela aqhuba ngalo loludaba esetshelwe ngalo.
Kodwa isikhulumeli sakoBulawayo kuMDC uMnu. Swithern Chirodza, osanda ukukhethwa kulesi isikhundla uthi kabalivumi icala abeletheswa ngabanye babo.
