Ukubonakala komkhokheli welinye lamacele e-MDC-T uNkosazana Thokozani Khupe emkhosini wokugcotshwa kukamongameli Emmerson Mnangagwa eHarare ngeSonto kwamukelwe ngembono etshiyeneyo; abanye besithi kuyabukeka kodwa abanye besithi mhlawumbe wayevele esebenzelana lebandla leZANU PF phambilini kokhetho. UNkosazana Khupe ubekhatshwe ngezinye iziphathamandla zebandla lakhe ezibalisa uMnu. Obert Gutu, uNkosikazi Priscilla Misihairambwi Mushonga loNkosazana Linda Masarira. Esinye isiphathamandla salelibandla uMnu. Witness Dube uthi bathethe lelinyathelo njengebandla ngoba ukhetho solwedlule ngakho sokufanele abantu basebenze ndawonye ukuthuthukisa ilizwe.
Lanxa umongameli Emmerson Mnangagwa esithi ubenxuse bonke abancintisa kukhetho lokudinga umongameli, isikhulumeli sikaMnu. Nelson Chamisa okhokhela umanyano we MDC Alliance, uMnu. Nkululeko Sibanda uthi ibandla lakhe belingamenywanga.