Njengobanje ikhefu leKhisimusi selimnyango, izizalwane zeZimbabwe ezisebenza kweleSouth Africa zithi lonyaka kuzakuba liKhisimusi elimunyu njengoba iRand abalithweleyo lizaphelelwa ngamandla wonke nxa sebefika eZimbabwe.
I-Rand seliphelelwe ngamandla okokuthi abeZimbabwe laba kuzadingeka umuntu abe le R1000 ukuthi athole okuyi $68.
Inengi lezizalwane zeZimbabwe kweleSouth Africa lithi imitshaqana isibotshiwe, njengoba sebelungele ukuyakudla iKhisimusi lezihlobo labangane eZimbabwe. Kodwake ukuwa kwesisindo seRand abalithweleyo sekutshiye inengi lingazi kuyozalwa nkomoni nxa befika ekhaya.
Isizalwane seZimbabwe umnumnzana Benny Masuku, uthi uphose waqaleka ngenyanga ephelileyo ngesikhathi esekhaya lapho athi uthe esiyantshintsha amaRand azinkulungwane ezilitshumi lane (R14000) bamupha inkulungwane eyodwa yamadola eMelika-$1000.
Uxwayisa abanengi ukuthi njengoba amabombo esebheke ekhaya ngekhisimusi umuntu ahle abophele eyokuphenduka enqulwini.
Esinye isizalwane seZimbabwe umnumnzana Mlamuli Nkomo uthi kuhle umuntu ahle asuke kweleSouth Africa esephethe amadola hatshi ukuyazithola ususehliswa ebhasini imali isiphelile.
Lobanje ukungena lokudla eZimbabwe sekulukhuni ngenxa yokuqonga komthelo, umnumnzana Masuku uthi kuzabangcono ukuthi abantu bahle bathenge ukudla kweleSouth Africa.
UNkomo uthi usizi yikuthi inengi kalilazo incwadi ezisemthethweni ezifuneka emabhanga nxa uzontshintsha imali. Uthi okunye osekubakhathaza kakhulu yikuthi sekulamanye amavinkili avele esesithi wona kawemukeli i Rand.