Ibandla leZanu PF selale ukwamukela isicelo seMDC esokupha obengumsekeli kamkhokheli wayo uMnu Gibson Sibanda inhlonipho yeqhawe lesizwe.
Amacele womabili eMDC alobele uMongameli Robert Mugabe incwadi ngoLwesibili ekhalaza ngokuthi uSibanda anikezwe linhlonipho, kodwa idale leZanu PF politburo libikwa likwalile lokhu lisithi uSibanda kalungelanga ukuyiphiwa linhlonipho.
Umkhokheli welinye lamacele eMDC uMnu Arthur Mutambara, usole kakhulu iZanu PF ngokuthatha isinqumo lesi.
Ekhuluma lentathelizindaba eHarare ngolweSithathu uMutambara uthe kuyamdanisa ukubana uSibanda uncitshwe inhlonipho yeqhawe yena engumuntu osebenzele ilizwe kangaka.
Icele elikhokhelwa nguMnumzana Morgan Tsvangirai lalo lisole iZanu PF ngokuthatha lesi sinqumo. USibanda uzangcwatshwa ngeSonto ekuseni emzini wakhe eFilabusi.
Isiphathamandla seMDC uMnu Paul Themba Nyathi uchasisa ngamalungiselelo alumngcwabo kungxoxo ayenze loNtungamili Nkomo oweStudio 7.
